Video Jens Napãtuup inooqataatalu angerlarsimaffianni pissutsinik takutitsisoq, Facebookikkut siammarterneqartoq, ilaatigut pissutigalugu, taanna Inatsisartunit sulinngiffeqarnissaminik marlunngornermi qinnuteqarpoq. Assi: KNR / Malik Brøns

Naalakkersuinermik malinnaasoq: Uppernassuseerukkiartorneq, tatigineerunneq pakatsinerlu

Inuiaqatigiit inunnut tunngasunik qattussisut, politikerilli suleqatigiinnissaannik kissaateqartut, naalakkersuinermik malinnaasoq isumaqarpoq.

Siumut sinnerlugu qinigaagaluartut qatanngutigiik Minik aamma Qarsoq Høegh-Dam ikiaroornartoq pillugu suliat pissutigalugit qinikkatut sullissisinnaajunnaarput.

Video Jens Napãtuup inooqataatalu angerlarsimaffianni pissutsinik takutitsisoq, Facebookikkut siammarterneqartoq, ilaatigut pissutigalugu, taanna Inatsisartunit sulinngiffeqarnissaminik marlunngornermi qinnuteqarpoq.

AAMMA ATUARUK Jens Napãtôk søger om sygeorlov fra Inatsisartut

Qinigaaffiup nutaap Naalakkersuisut nutaat Inatsisartunullu ilaasortat nutaat atuutilerfianni inunnut tunngasut maluginiarneqanngitsoorsinnaanngitsut saqqummertut imaaginnavipput.

Tamannalu inuaqatigiit qinigaannut tatiginninnermik innarliisoq, naalakkersuinermik malinnaasoq, Irene Jeppson, isumaqarpoq.

- Politikerit tassaasussaapput maligassiuisut. Ajoraluartumilli qinikkat ilanngui taamannak pissusilersunngitsut takujuarparput. Pisut imaluunniit pinikut avaanngunartut tusartarpagut. Inuiaqatigiinnilu initoorujussuupput. Taamatut pisoqartillugu tatiginassuseq tammartarpoq, uppernassuseerunneq pakatsinerujussuarlu pisarput.

Inuiaqatigiinniillu qinikkat avaanngunartunik iliuuseqartarnerat qattunneqartoq, taanna isumaqarpoq.

- Qanortoruna suleqatigiinniarlik, partiilersornersoq qatsunnarsisoq malunnarami, inuaqatigiit akornanni qatsunneqartoq.

Pissangassutit takorroortuusisat

Sermitsiamittaaq Politikkimut tunngasunut aaqqissuisoq, Jensine Berthelsen pisunut malinnaavoq. Pisullu aporaaffiusut uteqqiapput.

- Tassa taanna sillimaffissaajuaannartoq, inatsisartunut imaluunniit qiningaaffinnut sunulluunniit sassarnialertigani nammineq nalunngeqatigiissuseq naapertorlugu innuttaasunut kiinnersinnaaneq ilivitsuunersoq soorunami eqqarsaatigereersimasariaqarpoq.

AAMMA ATUARUK Video: Siumut Demokraatillu Inatsisartunit akerliullutik aninerat takuuk

Avaanngunartunillu iliuuseqarnerit politikkikkut sulianinngaanniit ukkatarineqarnerusarnersut aperineqarami ima akivoq:

- Qinersinerit tamaasa arlaatigut qiningaasinnaanermut tunngasunik suliaqartoqartarnera pinngitsoorneqarsinnaaneq ajorpoq, taamaammanuna taanna inuup nammineq akisussaaffimmik sassarnissaq sioqqullugu tingusisussaanera, taanna torersumik ingerlatsisoqarnissaanut pitsaanerpaassaaq.

Tamannalu ajornartorsiutaasoq Irene Jeppson isumaqarpoq.

AAMMA ATUARUK Erik Jensen Qarsoq Høegh-Dam aamma Minik Høegh-Dam tunngasunut ajuusaartoq

- Uani pikkorilluinnartunik oqallorilluinnartunillu akornatsinniittoqartoq eqqaasinnaavara. Taakkua oqaatsit atorlugit tiguaallaqqittorujussuupput, allaallumi immaqa ingasangineqarsinnaavoq, kisianni uupakaatitsisinnaallutik. Tamanna takussaasorujussuuvoq, naak immaqa taakkua pissuserippallaarsimanngitsut naluneqanngikkaluartoq.

Tukanneq qattunnartoq

Naalakkersuisoqatigiit nutaat naalakkersuisunik nutaanik sapaatit akunneri marluk qaangiummata saqqumiigamik ukiunut tulliuttunut sisamanut aallartilluaraluarput.

AAMMA ATUARUK Siumut har meldt Jens Napaattooq til politiet

- Naalakkersuisut nutaat persuarsiortumik katuami ilisaritimmata silaannaq nuannersuusoq malugineqarsinnaavoq. Inoqatinut attaveqaatini takusakka malillugit innutaasut akornanni neriuteqarluarneq, nunatta patajaatsumik ingerlanneqarnissaanik kissaatigineqartoq malunnarluni.

Irene Jeppson oqarpoq nangillunilu:

- Taamaattumik taamatut tukattumik aallartittoqarnera uggornarpoq. Neriunniarna maannakkut politikerertatsinnik sullissilluartunik takussasugut, neriunniartalu sulianik avaanngunartunik nutaanik takkuttoqaqqissanngitsoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat