Naalakkap illuani assortuunnerit

Sofiannguaq Petersenip akuerisinnaanngilaa, Provsteqarfik Avannaata ukiut pingajussaa aningaasartuutissannik siuppuinera.

- Allatut ajornaqaaq mianersortariaqarpugut. Ajornanngippallaaqaaq siuppuijunarneq, naak paasitinneqarsimagaluarluni, Biskoppi Sofiannguaq Petersen knr.gl-mut oqarpoq.

Provsteqarfik Avannaa maanna millionit missaannik siuppuereerpoq, siornalu siuppuinerit millionit affaannik amerlassueqarsimallutik.

Avannaani Provsti Hans Johan Lennert knr.gl-mut oqarpoq, uani pisumi Namminersorlutik Oqartussat pisussaaffimminnik qimarratiginnittut.

- Orsussamut akit qaffannikuupput, qaffaataannut tunngatillugu aningaasanik malitseqartitsisoqarnikuunngilaq. Maannamut Provsteqarfik Avannaani palasimut illuutivut inoqanngisut aningaasartuutigaavut, Hans Johan Lennert oqarpoq.

Maanna Avannaani palasitut atorfiit pingasut inuttaqanngillat, tassalu Qaanaami, Kangaatsiami Upernavimmilu.

Biskoppip oqaatigaa, aningaasartuutaajumaartut siumut ilisimaneqareertartut, Provsteqarfiullu Avannaata nammineq misilittakkani ilinniarfigisimasariaqaraluarai asuli kukkussutit uteqattaaginnarnagit.

Siullermik Provsteqarfik Avannaa aningaasanik sippuivoq ukiut pingasut matuma siorna, taamani aningaasat 300.000 koruuninik sippuipput, aappaaguanilu 400.000 koruuninik sippuisoqarluni. Siorna Provsteqarfik Avannaata koruunit millionit affaanik sippuivoq. Ukiormannalu qaammatit aqqarnganni sippuineq koruunit millionit missaannik annertussuseqalereersimavoq. Biskoppeqarfillu ilisimatitsivoq ukioq manna allanit ikiorneqarnissaq naatsorsuutigineqarsinnaanngitsoq.

- Siorna sippuinerit millionip affaanik annertussusillik matussuserniarlugit Provsteqarfiit Kujataa kiisalu Qeqqa ikiuisariaqarsimapput, ukioq manna ikiuinissaat naatsorsuutigineqarsinnaanngilaq, Biskoppeqarfimmi allaffimmi pisortaq Morten Nornild knr.gl-mut oqarpoq.

Provsteqarfik Qeqqa aningaasanik 200.000 koruuninik annertussusilinnik siorna sipaarniartariaqarsimavoq, avannaani sippuisimaneq matussuseeqataaffiginiarlugu. Kujataani aningaasat 300.000 koruunit sipaartariaqarsimavaat matussuseeqataanissamut atugassat.

Morten Nornild oqarpoq Avannaani aningaasaqarneq taamatut ingerlaneranut nassuiaatissaq ataasiinnaasoq.

- Avannaa aningaasatigut aqutsisinnaanermut aaqqissuussisoqarneq ajorpoq, Morten Nornild oqarpoq.