Naalagaaffiup politiivi nuannaraagit?

Danmarkip naalagaaffiata politiivi facebookimi ikinngutitaarisinnaanngorpatit.
januaarip 26-at 2012 07:24

Naalagaaffiup politiivi Facebookimi quppersassagartaarmata Danmarkimiikkaluaruit Nunatsinniikkaluaruilluunniit attaveqarfigisinnaanngorpatit.

Svenskit politiivi facebookimut ilanngunnerat iluatsilluarsimariarmat, qallunaat naalagaaffiata politiivi tamassuma asserluinnaanik iliuuseqarput. TV2.dk taama allaaserisaqarpoq.

Sverigemi politeeqarfiit 19-it facebookimi attaveqarfigineqarsinnaapput, innuttaasullu paasissutissaataat politiinit atorluarneqalereersut oqaatigineqarluni.

Naalagaaffiup politiivisa attaveqarnermut pisortaata, Jens Gregersenip oqarnera naapertorlugu, innuttaasut akulerulluarneqarnissaat siunertarineqarpoq, innuttaasullu inuusunnerusut facebooki atugarisuulluarmassuk tassuunaqquullugu taakku attaveqarfiginiarneqartut.

Politiit nutaaliornerat marsip tungaanut atuukkallassaaq, tamatumalu kingorna ingerlaqqissanersoq nalilersorneqassalluni.

Kalaallit Nunaanni politiit siunissami facebook-imiittalernissaat, Naalagaaffiup politiivisa attaveqarnermut pisortaata, Jens Gregersenip takorloorsinnaalluarnerarpaa.