Naalagaaffiup kalaallit meerartaat ikiorniarpai

Nunatsinni Danmarkimilu isumaginninnermi oqartussat akornanni ilisimatitsinissamik pisussaaffiliisoqassaaq. Danmarkimi isumaginninnermut ministeri Karen Hækkerup taama siunnersuuteqarpoq.
Allattoq Elisa Isaksen
oktobarip 25-at 2011 06:37

Taamaattumik taassuma Mimi Karlsen atassuteqarfigaa, taakkulu marluullutik najoqqutassanik nutaanik ataatsimoorussamik suliniuteqarniarput. Ilaqutariit atukkamikkut ilungersunartorsiortut ullutsinni Danmarkimut imaluunniit Nunatsinnut nuukkaangamik ajornartorsiutitik isertuullugit inuusinnaasarput.

- Meeqqat taama inissisimasut isumagisinnaanissaannut aaqqiissutissamik pilersitsisariaqarpugut, Karen Hækkerup aviisimut Politikenimut oqarpoq.

Peqatigiiffik Kalaallit Meerartaat ukiuni sisamani suliniumminik, Danmarkimi Inuuneq Pitsaanerusumik taaguutilimmi paasisatik saqqummiutereeraallu, ministeri taama oqaaseqarpoq. Suliniummi pineqartumi meeqqani 120-ni peqataatinneqartuni, meeqqat pingasuugaangata marluk ajornartorsiuteqarnerat kommuninit paasineqartarsimanngilaq. Meeqqanit taakkunannga 30-t angerlarsimaffiup avataanut inissinneqarsimalerput.

Kalaallit meerartaat atugarissaannginnerpaat Danmarkimiittut ikiorniarlugit, Danmarkimi naalakkersuisut nutaamik periaaseqalissasut, Karen Hækkerupip neriorsuutigaa. Suliniutissanut isumaqatigiissutissaq 2013-imut atuuttussaq aappaagu isumaqatigiinniutigineqalerpat taanna piareersimassaaq. Suliniut Danmarkimi Inuuneq Pitsaanerusoq, suliniutissanut aningaasaliissutit atorlugit 2012-imut atuuuttussamik aningaasalersugaareerpoq.

Suliniut taanna Christiansborgimi ullumi isumasioqatigiinnermi nalilersorneqassaaq. Isumasioqatigiinnermilu oqaluuserineqartut pillugit, ullumi annerusumik tusagassiiumaarpugut.