Naalagaaffiup aningaaserivissua: Savalimmiuni aningaasaqarneq ajalusooratarsinnaavoq
![](/sites/default/files/styles/image_934x467/public/article_images/tinganes_torshavn_davide_gorla_flickr.jpg?itok=CKFSpz-e)
Naalagaaffiup aningaaserivissuata kvartalimut nalunaarusiaani nutaami taama mianersoqqussuteqartoqarpoq. Savalimmiuni aningaasaqarnerup 2013-imiilli siuariartupiloorsimanera nalunaarusiami erseqqissaatigineqarpoq, tamannalu suliffissaaleqinerup apparneranik pisortallu ilaatigut napparsimmavinnut atortulersuutinullu millionerpassuarnik aningaasaliissuteqarnerinik kinguneqarsimavoq. Nittartagaq Sermitsiaq.AG taama allaaserisaqarpoq.
Pisortat aningaasaliissutigisaasa ukioq manna 1,3 milliardit koruuniunissaat Naalagaaffiup aningaaserivissuata naatsorsuutigaa, tamannalu 2018-ip tungaanut ingerlaannassaaq.
Siuariartornerli siunissami aningaasaqarnerup ajalusoorutigineqarneranik kinguneqaratarsinnaavoq.
- Savalimmiuni aningaasarsiornerup unikaallannissaata tungaanut aningaasaliinerpassuit kinguartinnissaat Savalimmiuni naalakkersuisut isumaliutigisariaqarpaat, Naalagaaffiup aningaaserivissua nalunaarusiamini taama kaammattuuteqarpoq.
Savalimmiormiut namminneerlutik aningaaserivissuat 2013-imi atorunnaarsinneqarpoq, taassumali aallartisaqqinneqarnissaa Lagtingimit maanna pilersaarutigineqarpoq.