Naalagaaffiup angallataanni aquttut naalakkallu qaffaaffigineqarput
Isumaqatigiinniarneq pivoq marsip ulluisa pingajuanni, aqaguanilu 4-raani atsioqatigiissutigineqarput. Illua-tungeriit tunuliaqataasa maanna akuersissutigisimalerpaat.
Isumaqatigiissut nutaassaq Danmarkimi Personalestyrelsemi allaqqissaarneqareerpat atsioqatigiissutigineqassaaq, akissarsiallu pitsanngoriaataat atsioqatigiinneq naammasineqarpat kingumoortumik tunniunneqarsinnaalissallutik, taama Atorfillit Kattuffiata siulittaasua Erik Hammeken oqarpoq.
Isumaqatigiissut kingumoortumik 1. apriili 2008-miit 31. marsi 2011-ip tungaanut atuuppoq.
Ukiunut pingasunut agguarlugu aningaasarsiat tamarmiusut 10,5 procentimik qaffassapput, taakkualu saniatigut soraarnerussutisiassatut katersanut 2,1 procenti qaffaatigineqassaaq, taamaalilluni qaffaaneq siulleq aprilip aallaqqaataani 4 procentimik qaffaaffiussalluni.
Kalaallit Nunaanni Naalagaaffiup angallataat tassaapput politiit rigsombudillu angallataat. Uanilu aningaasarsiat pillugit isumaqatigiinniarnermi pineqarput naalagaaffiup angallataani naalakkat aquttullu.