Naalagaaffiup aallartitaa nutaaq sulilerpoq
apriilip 01-at 2005 16:57
45-nik ukiulik Søren Hald Møller naalagaaffiup aallartitaatut ullumimit sulilerpoq.
Søren Hald Møller Aatsitassanut Pisortaqarfimmi allaffimmi pisortatut atorfini qimallugu maanna Peter Lauritzen naalagaaffiup aallartitaatut kingoraarpaa. Peter Lauritzen aallartitatut 2002-mit atorfeqareerluni Danmarkimut uterpoq.
Naalagaaffiup aallartitaatut atorfik naalagaaffimmi qaffasinnerpaartaavoq, assersuutigalugulu folketingimut qinersinernut akisussaasuusarpoq kunngikkormiullu Nunatsinni tikeraarnerannik pilersaarusiortuusarluni.
Søren Hald Møller inuiaqatigiilerinermik ilinniagartuujuvoq, cand.phil.-itut allagartaqarluni, Namminersornerullutik Oqartussanilu 1987-imit atorfeqarsimavoq, ilaatigut pisortaanertut 1999-imit 2002-mut sulisimalluni.
