Immikkut ilisimasallit: Naalagaaffimmit tapiissutit unitsissappata iliuuserineqartut oqaatsinit amerlanerusariaqarput

Nunarput Danmarkimit ataatsimoortumik tapiissutisiaqarani nammineersinnaalissappat aningaasaqarnikkut malunnaatilinnik aaqqissuusseqqittoqartariaqarpoq. Aningaasarsiornermik immikkut ilisimasallit marluk ataatsimeersuarnermi Future Greenlandimi taama oqarput.

Akileraarutit akitsuutillu marloriaatinngortissavagut? Nunatta kaaviiaartitai ataatsimoortut BNP-mik taaneqartartut marloriaatinngortissavagut?

Tamakkuupput  ataatsimeersuarnerup  Future Greenlandip, nunatta aningaasaqarnikkut kiffaanngissuseqarluni politikkikkullu namminersornermik qanoq anguneqarsinnaanera qulequtaralugu ataatsimeersuarnerup ulluata aappaani oqaluuserineqartut ilaat.

Nunatsinni aningaasaqarnermut siunnersuisoqatigiit siulittaasuata Torben M. Andersenip aammalu lektorip soraarnerup Lars Lundip oqalugiaataat nunatta namminiilivinnissaanut aningaasaqarnermullu tunngassuteqarput.

Torben M. Andersenip oqalugiarnermini oqaatigaa, nunatta aningaasaqarnikkut kiffaanngissuseqarluni ingerlanissaanut naalagaaffimmit ataatsimoortumik tapiissutit unitsissappata,  politikerit oqaluinnarnerminnit iliuusaat amerlanerusariaqartut.

Lektorip soraarnerup Lars Lundip oqaatigaa politeeqarnermut akisussaaffik nunatta oqartussaaffigilissaguniuk akileraarutigut maanna 10 procentimik qaffattariaqassasut, oqartussaaffiillu nunatta tigusinnaasai maanna 30-t missarluinnaaniillutik. Taassuma aamma oqaatigaa, akisussaaffiit Danmarkip maanna oqartussaaffigisai nunatta oqartussaaffigilissagunigit naalagaaffimmit ataatsimoortumik tapiissutit 3.8 milliardit koruuniusut unitseqqaarnissaat silatusaarnerussasoq.

AAMMA ATUARUK Nunanut allanut tunngasuni qaffasissumik atorfillip nunarput USA-lu imminnut qaninnerulersissavai

Aningaasaqarnermut siunnersuisoqatigiit siulittaasuata namminiilivinneq maanna pissappat, nunatta aningaasaqarnikkut kaaviiaartitai BNP-it marloriaatinngortinneqartariaqartut imaluunniit akileraarutit akitsuutillu taamatuttaaq marloriaatinngortinneqartariaqarnerarpai.

Nunatta aningaasarsiornikkut isertittagaata affaanik amerlanerusut avataanit, soorlu naalagaaffimmit ataatsimoortumik tapiissutinit EU-miillu isertinneqartarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat