Naalagaaffimmit tapiissutit isumaqatigiinngissutigaat

Danmarkip aningaasat Savalimmiunut ukiumut tapiissutigisartagai siunissami qanoq amerlatigissanersut Savalimmiuni Naalakkersuisut iluminni isumaqatigiinngissutigaat.

Partiip talerpilliusup, Sambandspartip, Savalimmiut Danmarkimut qanittumik attaveqarnissaanik isumaqartup, naalagaaffimmit tapiissutit akinut malinnaasitaaqqilernissaat kissaatigaa.

Aningaasalli naleerukkiartornerat ilutigalugu, naalagaaffimmit tapiissutit amerlineqarnissaat, Konservativini illuatungiliuttuni partiip aappaata, Folkeflokkenip, kissaatiginngilaa – Folkeflokken tassaavoq partii Savalimmiut siunissami namminersulernissaannik kissaateqartoq.

- Naalagaaffimmit tapiissutit suli nikittussaajunnaaqqagallassapput. Savalimmiuni aningaasaqarneq Danmarkimut taamaalilluni pituttorsimavallaarunnaassaaq, Folkeflokkenimi siulittaasoq, Inatsisartuni siulittaasuusimasoq, Folketingimilu ilaasortaasimasoq, Anfinn Kallsberg, Savalimmiuni Radiomut erseqqissaavoq.

Savalimmiuni Naalakkersuisut Danmarkimilu Naalakkersuisut naalagaaffimmit tapiissutissat pillugit aasap ingerlanerani isumaqatigiinniassapput, tassa tapiissutissat 2007-imiit atuutilersussat.

Savalimmiut manna 615 millioni koruuninik Danmarkimiit ukiumut tapiissutisisarpoq.