Naalagaaffik sooq salliuliortarsimanersoq nassuiarneqaqquaat
Naalagaaffiup atorfilittaasa Kalaallit Nunaat Savalimmiullu pillugit FN-imut kukkusumik paasissutissiisarsimanerannik taasatik pillugit Avannaani Suleqatigiit apeqquteqarlutillu Folketingimi oqallitsitsinialerput.
Atlantikup Avannaani Suleqatigiit sinnerlugit Lars-Emil Johansenip Høgni Hoydahlillu paaserusuppaat sooq naalagaaffiup atorfilittai 1999-mi FN-imut oqarsimanersut Kalaallit Nunaanni Savalimmiunilu namminersulivinnissaq pillugu taasisitsisoqalersaanngitsoq, uffa taamaattoqartoq, sunalu pillugu atorfillit FN-imut 2001-mi oqarsimanersut kalaallit savalimmiormiullu danskisut misigisut, uffa taamaattoqanngitsoq.
Aamma paaserusuppaat qaqugu Danmarkip FN-imut nassuerutiginiarneraa kukkusumik paasissutissiisoqartarsimasoq. Ilanngullugu statsminister Anders Fogh Rasmussen Folketingip ataatsimiittarfiani nassuiaateqaqquneqarpoq kukkusumik paasissutissiisarnerit siunissami pinngitsoorniarlugit qanoq iliulersaarnersoq.
- Kukkusumik nalunaaruteqartoqarnera unitsinneqartariaqarpoq, naalagaaffiullu kukkussutini naqqiuteqarfigisariaqarpai, Lars-Emil Johansen oqarpoq.
Atorfillit kukkusumi nalunaaruteqartarsimanerat kalaallinik savalimmiormiunillu politikikkut ataqqinninngertut isigisariaqartoq Atlantikup Avannaani Suleqatigiit isumaqarput.
-Inuiannik ataqqinninnginerujussuartut isigisariaqarpoq. Allaat ima sakkortutigisumik oqartariaqarpugut sallu atorlugu inuianni pissutsit oqaluttuarineqartarsimasut, Lars-Emil Johansen oqarpoq.
Statsministerimut apeqqutit allakkatigut akisassat marluk Lars-Emil Johansenip Høgni Hoydahlillu apeqqutigaat, Folketingillu ataatsimiittarfiani oqallinnissamut apeqqut Lars-Emil Johansenimeerpoq.
Enhedslistimeesoq Keld Albrechtsen statsministerimut apeqqummik ippassigami aamma ssaqarpoq. Albrechtsenip paaserusuppaa Atlantikup Avanaani Suleqatigiit ilisimatuunik misissuisitsineranni saqqummiunneqartutut salluliortoqarlunilu paasissutissanik allanngortiterisoqartarsimanersoq.