Naalagaaffiit pisuujunerpaat milliardi dollarerpassuarnik ikiorsiinialerput

Nunarsuatsinni naalagaaffiit pisuujunerpaat 20-t naalakkersuisuisa, maanna Londonimiittut, nunarsuatsinni aningaaserivinnut ajornartorsiortunut dollarit miliarderpassuit ikiorsiunniarlugit isumaqatigiipput. 4.000 milliardi dollarit nunarsuatsini aningaasat nalinginik nakkutilliisoqarfimmut, 1.400 milliardi dollarillu naalagaaffiit akornanni niueqatigiinnerup ingerlallualeqqissinnaaneranut ikiorsiutiginiarneqarput. Professor Jesper Rangvedip oqaluttuaraa aningaasarpaasuit qanoq agguaanneqassanersut.
apriilip 02-at 2009 17:07

Jesper Rangved oqarpoq aningaasarpassuit nunanut ineriartortunut aningaasaqarniarnikkut eqqorneqarnerpaasunut, soorlu nunanut europap kangianeersunut qinnuteqarnikkut tunniunniarneqarput. Amerlanerpaalli naalagaaffiit akornanni niueqatigiinnermi atukkiisariaqartarnernut atorniarneqarput. Atukkiisarnerimmi ataatsimut isigalugit unittuissimammata. USA-p Tuluillu Nunaata pisortat suliffeqarfiinut aningaasarpassuit atorniaraluaraat, Frankrig Tysklandilu niueqatigiinnerup eqaallisaqqinnissaanut atorneqarnissaat piumasarigamikku taakkua kissaataat piviusunngorpoq, pisortaqarfinnummi aningaasaliinissaq ataatsinnguamilluunniit isumaqatigiissutaasumi eqqaaneqanngilaq.

Obamali unnukkaa oqarpoq, maannakkut isumaqatigiinneq oqaluttuarisaanermi kisiartaasoq. Ukiut qulit, 20-t, 30-lluunniit matuma siorna oqartoqarsimasuuppat naalagaaffiit Tyskalnd, Frankrig, Kina, Rusland, Brasilia, Afrika Kujallaeq kiisalu Amerikap præsidentia Obama-mik atilik isumaqatigiissinnaassasut, taamatut oqartoq iluarpianngitsutut isigineqassagaluarpoq. Taamaakkaluartorli ajornartorsiutigivallaarnagu isumaqatigiissusiorpugut, Obama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq