Nunat tamalaat coronavirusip tuniluutilertornerata kingunerisaanik ajornartorsiornerat pissutaalluni Glasgowimi ataatsimeersuarnissaq kinguartinneqarpoq.Assi: Cristina Quicler/AFP/Ritzau Scanpix

Naalagaaffiit Peqatigiit silap pissusia pillugu ataatsimeersuarnissaraluat kinguartinneqartoq

Coronavirusip tuniluutileruttornerata kingunerisaanik COP26-mik taallugu silap pissusia pillugu Glasgowimi novembarimi pilersaarutit malillugit ataatsimeersuartoqarsinnaanngilaq.

Naalagaaffiit Peqatigiit silap pissusia pillugu COP26-mik taallugu Skotlandimi Glasgowimi novembarimi ataatsimeersuartussaagaluarput, coronavirusilli nunani tamalaani tuniluutilernera pissutigalugu 2021-mut kinguartinneqarluni.

Tuluit naalakkersuisuisa tamanna pingasunngornermi unnukkut uppernarsarpaat.

Naalagaaffiit Peqatigiit silap pissusia pillugu allattoqarfiat, Tuluillu Nunaat Italialu oqaloqatigeereerlutik taama aalajangerput. Tuluit naalakkersuisui taama nalunaaruteqarput.

- Covid-19 nunarsuarmiunut ullutsinni navianartorsiortitsinerpaavoq. Silalli pissusiata allanngoriartornerata nunarsuarmiunut siunissaq ungasinnerusoq eqqarsaatigalugu navianarnerunera puigussanngilarput, Patricia Espinosa, Naalagaaffiit Peqatigiit silap pissusia pillugu allattoqarfiani qullersaq oqarpoq.

Nunat assigiinngitsut silap pissusiata allanngoriartorneranik akiuiniarnerisa nukittorsarneqarnissaat, Glasgowimi ataatsimeersuarnermi pingaarnertut anguniarneqaraluarpoq. Silap pissusiata allanngoriartornerata akiorniarneqarnissaanut Parisimi isumaqatigiissummi nunat assigiinngitsut neriorsuutigereerpaat.

Nunat tamalaat coronavirusip tuniluutilertornerata kingunerisaanik ajornartorsiornerat pissutaalluni Glasgowimi ataatsimeersuarnissaq kinguartinneqarpoq. Silammi pisssusiata allanngoriartornerata akiorniarneqarnissaanut anguniakkat maanna ataatsimeersuartoqaraluarpat anguneqarsinnaassannginnerat ernummatigineqarsinnaasoq, Naalagaaffiit Peqatigiit oqaatigaat.

Isummersuutit