Naalagaaffiit Peqatigiit pisortaat Myanmarimut tikeraarpoq

Naalagaaffiit Peqatigiit pisortaata Ban Ki-Moon-ip Myanmarimi ministeriuneq Thein Sein, ullumi ataatsimeeqatigissavaa. Ban Ki-moon maanna tikeraartuuvoq, nunap ilaani kiattup anorersuata sapaatip akunnerisa pingasut matuma siornagut eqqugaannut annerusumik ikiorsiisoqartariaqarneranik, sakkutuut kisermaassillutik naalakkersuisuusut sunnerniaraluassallugit.
Allattoq Louise M. Kleemann
maajip 22-at 2008 06:55

Nunap kujasinnerusuani kiattup anorersuata eqquineratigut, illoqarfiit nunaannarmiittut piuneerussaammata, inuit 133.000-it ajunaarsimasutut maqaasineqarput. Inuit 2 miliuunit nerisassanik, imermik minguitsumik, tupernik nakorsaatinillu ikiorserneqarnissaminnut suli maannamut utaqqiuarsinnarput.

Nunat tamat ikiorsiissutiginiagaat ikiortariaqartunut taamaallaat killilimmik anngussimapput, aamma sakkutuut kisermaassillutik naalakkersuisuusut innuttaminnik isumaginnissinnaannginnertik takutereerpaat.

Ban Ki-moon aqagu timmisartorluni illoqarfiit pingaarnersaannut Naypyidaw-imukassaaq, sakkutuut kisermaassillutik naalakkersuisuusut pisortaat Than Shwe ataatsimeeqatigiartorlugu. Aamma oqaatigisinnaavarput 1964-ip kingornagut Ban Ki-moon Naalagaaffiit Peqatigiit pisortaatut Myanmarimut tikeraartunit siullersaammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq