Naalagaaffiit Peqatigiit Nunap inoqqaavisa atugaat pillugit isummersoqatigiiffianni ataatsimiilersut
Ukiut tamaasa ukiuni kingullerni 14-ini nunap inoqqaavisa sinniisaat New Yorkiliaasarput sapaatit akunnerini marlunni ajornartorsiutitik, ingammillu nunaminneq ajornartorsiutitik immikkut ittut oqallisigiartorlugit. Ajornartorsiutit aaqqinniarnerini ikiorsertariaqarsoritatik, imaluunniit nunarsuarmioqatinut apuunneqarsoriaqarsorisatik saqqummiussussallugit.
Permanent Forum Naalagaaffiit Peqatigiit aaqqissuussaaneranni pingaaruteqartuuvoq, isumaliutersuutaammi allakkallu uppernarsaatit tamarmik FN-imi ingerlateqqinneqartarput, amerlasuutigullu FN-imi sulianut allanut aalajangernernulluunniit tunuliaqutaasarlutik.
World Conference on Indigenous Peoplesimi siorna septembarimi FN-imi ataatsimiissutaasut inerneri ukioq manna ilaatigut saqqummiussorneqassapput. Siorna ilaatigut ICC Nunatsinniit aamma peqataatitaqarpoq.
Inuusuttut imminullu toquttarneq immikkut sammineqassapput
Oqallisigisassat ukioq manna ilagaat inuusuttut imminullu toquttarneq. Soorlu Canadami, inuusuttut imminut toquttarnerat naliginnaanngitsumik assut ajornartorsiutaasoq, ingammik naggueqatigiit inuit indianerillu 15-niit 25-it tungaannut ukiullit akornanni.
Tamakkumi canadamiunut allanut naleqqiullutik aqqanileriaammik akulikitsigisumik immiunut toquttarmata.
Imminut toquttarnerit nunarsuarmi nunap inoqqaavisa akornanni assut ajornartorsiutaavoq.
Pngaaruteqartut ilagaat nunap inoqqaavisa piginnaatitaaffii pillugit FN-imi piviusunngortinnissaasa oqallisiginissaat.
FN-imi Nunap inoqqaavisa oqallittarfiat ukioq manna ataasinngornermi apriilip 20-anniit maajip aallaqqaataata tungaanut ingerlanneqassaaq.