Naalagaaffiit Peqatigiit mianersoqqusipput
Taama oqartut tassaasorinassagaluarput oqaluussisartup sukangasuup oqaasii, taamali oqartut tassaapput Naalagaaffiit Peqatigiit silap pissusaa pillugu ilisimatusartui 309-usut.
Nalunaarusiaq ’Global Environment Outlook’ (aamma taaneqartartoq GEO-4) tassaavoq nunarsuatta qanoq inneranik tamakkiisumik nalunaarusiaq.
Nalunaarusiami oqaatigineqarpoq miluumasut sisamaagaangata sisamaat inuup pissusilersorneranit ulorianartorsiortitaasartoq. Aalisakkat tatsiniittut affaat sapusiornerit aalisapilunnerillu pissutigalugit nungutaareerput. Minguitsumik imissaaleqineq pissutigalugu inuit ukiut tamaasa 3 miliuunit toqusarput – aamma Nunarsuatsinni inuit amerliartuinnarnerisa kinguneranik erngup nunallu piumaneqarneri alliartuinnarput. Nalunaarusiami ilisimatusartut oqaatigaat pinngortitaq arfinilissaanik suujunnaarsinneqarsinnaasoq, soorlu itsarsuaq dinosaurit nungummata taamaassimasoq, maannali inuup pisuussutigisaanik taama pisoqaraluttualersoq.
- Ajornartorsiutit tamakkua iliuuseqarfigineqanngippata, anguneqartut suugaluartulluunniit soqutaajunnaassapput inuullu uumaannarsinnaanera ulorianartorsiortinneqalissaaq, Naalagaaffit Peqatigiinniit taama oqartoqarpoq. Siunissap taartuinnaaneranik oqariartuuteqarnissaq siunertarineqanngilaq, kisianniliuna iliuuseqarnissap pingaaruteqassusia oqariartuutigineqartoq Naalagaaffiit Peqatigiinniit erseqqissarneqarpoq.
