Naalagaaffiit Peqatigiit atorfimmi peqquserlunnermut akiuineq pillugu isumaqatigiissutaa
- Atorfimmi peqquserlunnermik akiuineq inuiaqatigiinni inuit inatsisitigut illersugaanerannik pingaartitsisut nutaaliaasullu sananeqaataasa pingaarnerusut ilagaat. Atorfimmi peqquserlunneq inuussutissarsiornerni tamani piusinnaavoq. Taamaammat ammasumik asissuijuitsumillu politikerit inuillu allat soqutigisaminnik akuliutsitsisinnaanerat eqqartorneqartuartariaqarpoq, Sara Olsvig, siunnersuuteqartuusoq oqarpoq.
Kalaallit Nunaat isumaqatigiissummut suli akuersinikuunngilaq, naak 2006-imi isumaqatigiissut Danmarkip atortussanngortikkaluaraa. Taamatummi atortussanngortitsisoqarmat Kalaallit Nunaat Savalimmiullu nunatut ilaatinneqanngillat.
- Aatsitassarsiornermik aamma aalisarnermik ingerlatsinermi ineriartortitsinitsinnilu sapinngisamik isertuaatsuunissaq Nunatta qulakkeerniartariaqaraa, Sara Olsvig isumaqarpoq.
- Atorfimmi peqquserlunnerup akiornissaanut isumaqatigiissummik akuersineq ilorraap tungaanut pitsaasumillu alloriarnerussaaq. Taamaammat IA-p siunnersuut manna saqqummiuppaa neriuutigalugu partiit Inatsisartuni sinniisuutitaqartut sinnerisa ilassilluarumaaraat, Sara Olsvig oqarpoq.