Naalagaaffiit Peqatigiit: Angerlarsimaffinni persuttaasarnerit Kalaallit Nunaata iliuuseqarfiginerusariaqarpai
Naalagaaffiit Peqatigiit avammut oqaaseqartartuat, Manfred Nowak, Naalagaaffiit Peqatigiit ataatsimeersuareersullu taama nalunaarpoq, ataatsimeersuassutigaat Danmarkip naalagaaffiani inuttut pisinnaatitaaffiit qanoq atortinneqartarnerat. Nutaarsiassaqartitsivimmi Ritzauimi taama allaaserinnipput.
Manfred Nowak Kalaallit Nunaannut siorna tikeraarpoq, taamanilu maluginiareerpaa, angerlarsimaffinni persuttaasarnerit maluginiarneqanngippallaartut.
- Eqqartuussivikkoortitsisarneq naammanngilaq. Paasititsiniaaneq aamma pisariaqarpoq, Manfred Nowak oqarpoq, Naalagaaffiillu Peqatigiit ataatsimeersuarmata tamanna aamma eqqaavaa.
Naalagaaffeqatigiilli isertortumik paasiniaasartuisa, CIA-p, tigusanik Danmarkip Kalaallit Nunaatalu qulaani silaannakkut timmisartuussisarnerinik Danmarkip Kalaallit Nunaatalu misissuisitsisimanerat nalunaarummi nersualaarneqarpoq.
Tigusanik ilumut timmisartuussisoqartarsimanersoq USA-p uppernarsarumanngilaa, nunanulli allanut taamanikkut ministeri, Condoleezza Rice, neriorsuivoq timmisartuussisoqassagaangat Danmarkimi oqartussaasut kalerreqqaartarniarini.
Naalagaaffeqatigiit isertortumik paasiniaasartuisa, CIA-p, timmisartuussisarsorineqarnerata suleqatigiissitanit paasisimasaqarluartunit kikkunnulluunniit attuumassuteqanngitsunit suleqataaffigineqarnissaa Manfred Nowakip kissaatigilluinnarpaa.
