Naalagaaffiit Peqatigiit aalisarneq oqaluuseraat

Nunarsuarmi aalisagaqassutsimut kiisalu aalisakkanik tukertitsiviit pillugit nalunaarusiami Naalagaaffiit Peqatigiit suliniaqatigiiffiani FOA-mit tamanna paasineqarpoq.

Tamatumunnga pissutaasut ilagaat imartatsinni aalisagaqarfinni aalisapilunneq. Maannali aamma silap pissusaata allanngornerata aalisakkat navianartorsiortilerpai, tassami imarpissuit kissakkiartornerisa kinguneranik aalisakkat uumaffigisaminnit Qalasersuarmut Sikuiuitsumullu Kujallermut nuukkiartuaalermata, FOA taama allappoq.

FOA-p naatsorsuutigaa aalisakkat tamarmik 28 procentii aalisapilunneqarpallaartut imaluunniit nunguinneqarsimasut. Aalisakkat 52 procentii ima aalisarneqartigaat nungutaanissaminnut killissartik tikissimallugu.

Aalisapilunnermik ajornartorsiutip qiteraa nunarsuatsinni aalisariuteqarpallaarnera, aalisariutillu amerlasuut atortorissaarnertik iluaqutsiullugu aalisarluartarnerat, FOA-p aalisarnermut immikkoortortaqarfia taama tikkuaavoq.

Nalunaarusiaq ulluni makkunani Naalagaaffiit Peqatigiit aalisarnermut ataatsimiititaliarsuanit Cofi-mit nunanit 80-init aallartitaqarfiusumit oqaluuserineqaleruttorpoq.