Naalagaaffeqatigiit issittoq pillugu periusissaat Canadamiut nersorpaat
- Periusissaq pingaarutilerujussuartut Canadap tungaaniit isigineqarpoq. Canadap avannaanut periusissani akuersissutigereerpaa, Issittumilu nunanut allanut tunngasunut nalunaarut ukioq kingulleq akuersissutigalugu. Taamaattumik suliap Danmarkimiit, Savalimmiuniit kiisalu Kalaallit Nunaanniit ingerlanneqartup piffissaq ungasinnerusoq eqqarsaatigalugu pisariaqassusaa Issittumi najugaqartunut oqariartuutaavoq, Peter Lundy oqarpoq.
Periusissarlumi Canadamiut issittumi politikkiannut naleqqulluartuusoq, taanna oqarpoq.
- Iliuutsitsinnut assigusumik pisoqalernera Canadamiit iluarineqaqaaq. Tamatuma takutippaa pingaartitagut aarleqqutigullu assigiittut, Canadap Danmarkimi aallartitaa oqarpoq.
Naalagaaffeqatigiit issittumi periusissaata nunat tamalaat suleqatigiinnissaannik aallaaveqarnera Canadamit nuannaarutigineqarpoq.
- Pingaaruteqarpoq Issittumi qanoq iliorniarnerluta aalajangernialerutta nunat tamalaat inatsisaannik ataqqinninnermik periusissaq toqqammaveqarumaartoq, Peter Lundy oqarpoq.
Periusissaq pillugu annertunerusumik paasisaqarusukkuit danskit nunanut allanut tunngasunut ministereqarfiata nittartagaanut um.dk-mut alakkaasinnaavutit.
