Naalagaaffeqatigiit ataatsimiilerput

Kalaallit Nunaata, Savalimmiut Danmarkillu naalagaaffeqatigiittut ataatsimiinnissaat ullumi aqagulu ingerlanneqassaaq. Ataatsimiinneq Danmarkip ilaani, Sønderjyllandimi, ingerlanneqassaaq, ministeriuneq, Anders Fogh Rasmussen, ataatsimiinnermi aqutsisuussalluni.

Nunat taakku siuttui ”sallaatsunnguamik” ullumikkut aallartissapput, takornarniassallugit ilisimatusarnermut tunngassutilinnik takusaqarusulluni nuannaariartarfissuaq, Danfoss Universe, aamma Dybbøl Mølle, nunallu naalagaat taakku aamma Flensborgip Kangerluani angalaassapput. Naalakkersuisut siulittaasuata, Hans Enoksenip, Savalimmiuni Lagtingip siulittaasuata, Joannes Eidesgaardip taavalu Danmarkimi ministeriunerup ataatsimeeqatigiinnissaat ”ilumoorsaarnerusoq” aqagu ullaakkut aatsaat aallartissaaq.

Oqallisigisassanut ilaavoq, qinngornernik navianartunik Thulemi peqarnersoq RISØ-p misissuinera. Puisit amiinik Canadaminngaaneersunik ammeriviup Great Greenlandip piseqqittalerneranut Inatsisinik Atortitsinermut Naalakkersuisup isumaa kalaallinit qanoq isumaqarfigineqarnersoq aamma oqallisigineqassaaq. Kiisalu namminersorneq pillugu kalaallit-danskillu takussutissiaat ataatsimiissutigineqassaaq.

Nunani taakkunani siuttut ataatsimiinneranni naalagaaffimmi atorfillit aamma ataatsimiissapput. Namminersornerullutik Oqartussani pisortaaneq, Kaj Kleist ilisimatitsivoq, Angalanermut ilisimatitsissummik taaneqartartup Namminersornerullutik Oqartussanit aqunneqalersinnaanera Kalaallit Nunaannit ilaatigut oqallisigineqarusuttoq. Tunup Avannaarsuani nuna allanngutsaaliugaq takornarniarniarlugu kikkut sermersuarmik itiviisinnaanersut ilisimatitsissummi ilaatigut allassimasarpoq. Ilisimatitsissummik Dansk Polarcenter maanna aqutsisuuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat