Naalagaaffeqatigiinnerup iluani siuttut Igalikumi ataatsimiissapput
Naalagaaffeqatigiinnerup iluani naalakkersuisuni siulittaasut pingasut ataatsimiinnissaat Kujataani Igalikumi sisamanngorpat tulliani aallartissaaq.
Progammi malillugu Kuupik Kleist Helle Thorning-Schmidt-ilu Nuummi Hans Egedep illorsuani ullaakkorsioqatigeeqqaassapput, kingornalu Paamiut aqqusaarlugu kujammut Narsarsuarmut timmisartuunneqassallutik.
Lagmand Kaj Leo Johannesen Narsarsuarmi akuliutissaaq, naalakkersuisullu siulittaasui pingasuullutik ualikkut Igalikuliassapput, Igalikullu Hotel-eeraani naalagaaffeqatigiit ataatsimiinnissaat aallartinneqassalluni.
Hotel Narsarsuarmi unnukkut nereqatigiinnissami Kuupik Kleist qaaqqusisuussaaq, ataatsimeeqataasullu tamarmik qulimiguulimmut ilaallutik Qorlortorsuarmi imermik nukissiorfittaaq aqaguani tallimanngornermi takornariaqqaariarlugu Killavaat Alannguani aatsitassanik piiaavimmut takornariassapput.
Takornariarneq naammassineqariarpat angalaqatigiit Qaqortuliassapput tassanilu Hotel Qaqortumi ullup qeqqani nereqatigiittoqassalluni. Tamanna pereerpat angalaqatigiit Qassiarsummut ingerlaqqissapput, tassanilu qallunaatsiaat illukorsuat, Brattahlid, takornariarneqassalluni.
Danmarkip ministeriunerata, Savalimmiullu Naalakkersuisuisa siulittaasuata, aapparisatik angalaqatigissavaat. Igalikumiulli inunnik nuimasunik tikeraarneqartarnertik takornartarinngilaat.
Ukiormi 2004-mi USA-mmi nunanut allanut ministererisaata, Colin Powell-ip, Danmarkip nunanut allanut ministeriata Per Stig Møllerip aamma nunarput sinnerlugu nunanut allanut tunngassutilinnik naalakkersuisuusup Josef Tuusi Motzfeldtip Igalikumi isumaqatigiissusiaq persuarsiorpalaartumik silagissuup ataani 2004-mi atsioqatigiissutigaat.
Danmarkip ministeriunera Helle Thorning-Schmidt siusinnerulaartukkut nunatsinnut apuutissaaq. Nunatsinnullu tikeraarnini aallarnerlugu Tunup avannaani sakkutooqarfimmut Daneborg-imut ataasinngorpat aggustip 27-ani tikeraaqqaassaaq, tassanilu qimusserlutik alapernaarsuisartut Sirius pulaarneqassallutik.
Tamatuma kingorna Thule-mi sakkutuut timmisartoqarfiat tikissavaa, tassanilu marloriarluni unnueriarluni Nuummut ingerlaqqissaaq, tassalu naalagaaffeqatigiit ataatsimiinnissaanni peqataassalluni.
