VIDEO Naalagaaffeqatigiinnerup akusaa
Siumup Naalakkersuisullu siulittaasuat Kim Kielsenni Aalborgimi Socialdemokratit ataatsimeersuarneranni oqalugiartussat ilagaat.
Maani kalaallinut suut qungujunnarnersut, Nunatsinni aningaasaliisarneq, ilinniarsimasunik pisariaqartitsineq, danskillu sakkutooqarfiisa mingutsitsimaneri pillugit ilaatigut nassuiaateqarpoq.
Kim Kielsenittaaq siunissami Naalagaaffeqatigiinneq pillugu nammineq isummani partiimilu Siumumi eqqarsaatit saqqummiuppai, Kim Kielsenilu naapertorlugu periuseq Free Association atorlugu tamanna anguneqarsinnaasoq oqaatigalugu.
- Partii Siumut pilersinneqarmalli Kalaallit Nunaata namminersulivinnissaa sorsuutigisimavarput. Taamaakkaluartorli oqaatigiuarsimavarput Kalaallit Nunaat namminersortoq ikinnguteqartariaqarlunilu qanigisanik suleqateqartariaqartoq. Naalagaaffeqatigiinneq periarfissat ilagisinnaavaat. Amerlasuut isumaqartarput Kalaallit Nunaat namminersortoq naalagaaffeqatigiinnerup akerlerigaa. Uangali isumaqarpunga, naalagaaffeqatigiinneq ataannassappat namminersulivinneq pisariaqartoq, Kim Kielsenip oqaatigaa.
Kielsenip isumasiornera malillugu kalaaleq
Naak anaanani danskiugaluartoq nammineq kalaaliunini Kim Kielsenip naqissuserpaa. Kalaaliussusermi inuup iluani misigissusiusoq, Naalakkersuisut siulittaasuata naqissuserpaa.
- Uanga Danmarkimit Kalaallit Nunaanniillu akusaavunga. Inuiaat taakku akornanni asanninnerup pilersitaa. Anaanaga danskiuvoq ataatagalu kalaaliulluni. Anaanagalu maani Danmarkimi najugaqaraluartoq, qamani ilorpianni kalaaliunera qularisassaanngilaq. Misigissuseq taanna tarnip iluaniippoq, namminerlu aalajangersinnaanngilat.
Sumi angerlarsimasutut misigimasarneq apeqqutaavoq, Kim Kielsenni taama oqarpoq.
Parteeqammut inuulluaqqusissut
Kim Kielsen oqalugiarnermini Lars-Emil Johansen eqqaavaa. Taannami 70-iliinermi atatillugu Kim Kielsen namminersulivinnissamut sorsunneq puigorsimanerarlugu isornartorsiuivoq.
Nunarpulli naammattumik nunarsuarmi inooqataalernissaa anguniagaasoq Kielsinip naqissuserpaa.
- Ullumiunavianngilaq, aamma aqagu namminersulivinnavianngilagut. Ullulerneqarsimagaluarpoq, ilaasalu 70-inik ukioqalernerminni piviusunngortikkusukkaluarlugu. Arriittumik aqqutissarput naniartorparput. Imminut pillunga ima iliunngilanga, kinguaassagulli tulliuttut pillugit Kim Kielsen oqarpoq.
Kim Kielsenip oqalugiarnera uani takuuk:
