Naalagaaffeqatigiinnermi siuttut pingasut ataatsimiipput

Naalagaaffeqatigiinnermi siuttut pingasut , tassalu Savalimmiuni, Danmarkimi kiisalu nunatsinni Naalakkersuisut siulittaasuisa ukiumoortumik ataatsimiinnerat ukioq manna nunatsinni ullumikkut ingerlanneqarpoq.
Allattoq Jaaku Lyberth
juunip 22-at 2009 10:50

Naalagaaffeqatigiinni Naalakkersuisut siulittaasuisa pingasuusut ataatsimiinnertik tamarmiullutik aatsaavissuaq misilippaat, tamannalu pissutigalugu erseqqissaatigaat – taamatut ataatsimiittarnerit siuliinut sanilliullugu pitsaanerusimanersoq – imaluunniit ajornerusimanersoq – soorunami tamarmiullutik oqaaseqarfigisinnaanngikkitsik.

Suliffissuasqarnerup tungaatigut nunatsinni ineriartortitsisoqarsinnaanissaa siunertaralugu CO2-mik aniatitsisarneq pillugu iliuuseriarneqartut eqqarsaatigalugit nunatta immikkut isiginiarneqarsinnaanera Danmarkimi naalakkersuisut itigartinnikuusaat – nunatsinni naalakkersuisut siulittaasuata Naalagaaffeqatigiinnermi siuttut ataatsimiilerpata oqaluuseritinniarlugu siusinnerusukkut saqqummiussaqarpoq. Tamannali pillugu immikkorluinnaq nutaamik aaqqiissuteqartoqartussanngornera-nik ullumikkorpiaq angusaqartoqarsimanngitsoq, naalagaaffeqatigiinni siuttut pingasuusut ataatsimeeqatigeereerlutik tusagassiortunik katersortitsineranni erserpoq.

Naalagaaffeqatigiinnermi siuttut ataatsimeereerlutik oqaatigaat nunarsuatsinni silap allanngoriartornera akiorniarlugu iliuuseqartoqarnissaa avaqqunneqarsinnaanngitsoq akunnerminni tunngaviusumik paaseqatigiissutigalugu-lu isumaqatigiissutigigitsik. Tamatumali saniatigut inuussutissarsiornerup – suliffissuaqarnerullu – tungaatigut ineriartortitsisinnaaneq qulakkeerniarlugu iliuusissat qanoq ittuusinnaanersut piffissami aggersumi paaseqatigiissutiginiarneqartussaasut, nunatsinni Naalakkersuisut siulitttaasuata, Kuupik Kleist-ip aamma Danmarkimi ministeriunerup – Lars Løkke Rasmussen-ip – tusagassiortunik katersortitsinerminni oqaatigaat. Suli naluarput assersuutigalugu Kalaallit Nunaata suliffissuaqarnikkut ineriartortitisisinnaanisssaa aqqutissiuunniarlugu CO-2mik aniatitsinerulersinnaanera illua´tungilerniarlugu Danmarkimi CO-mik aniatitsinerup pilersaarutaasumit annerusumik millilerneqassasoq siunnerfigineqarsinnaanersoq – imaluunniit periarfissat suli aamma allat atorneqarsinnaanersut, Danmarkimi ministeriuneq – Lars Løkke Rasmussen – oqarpoq. CO2-mut tunngasut pillugit aaqqiiniutissat piffissami aggersumi nalilersuiffigeqqissaarneqarlutillu - Naalagaaffeqatigiit akunnernimmi paaseqatigiissutiginiartussaagaat, siuttut pingasuussut ataatsimeereerlutik erseqqissaatigaat.