Naalagaaffeqatigiinneq Folketingimi oqallisigigaat
![](/sites/default/files/styles/image_934x467/public/article_images/christiansborg_foto_simon_uldum2.jpg?itok=DUAbKXBN)
Tamanna pivoq Naalagaaffeqatigiit pillugit ministeriuneq ukiumoortumik nassuiaateqarmat.
Tassani ilimasaarutigineqarpoq, aaqqissuusseqqinnissat nalunaarutigineqarsimasut pillugit Danmark ikiuussinnaasoq.
Naalakkersuisooqatigiit aningaasanut inatsisissaq maani ullumi atsioraat, ministeriunerup Helle Thorning-Schmidtip Folketingip oqaluttarfianiit erseqqissaavigaa Kalaallit Nunaanni Savalimmiunilu aningaasaqarnertik namminneq akisussaaffigigaat.
- Imaappoq Savalimmiuni Kalaallit Nunaannilu namminneq aningaasaqarnertik aquppaat. Namminnerlu siunissamut atugarissaarnissamullu akisussaasuullutillu aalajangiisussaapput.
Tamannali erngumasunnguamik oqaatigineqarpoq...
Allaffissornikkut ikiuukkusuttut
Qallunaammi naalakkersuisui nalunaarput, aaqqissuusseqqinnissanut nalunaarutigineqarsimasunut aqutsinermut ikiuussinnaallutik.
- Savalimmiuni Kalaallit Nunaannilu inuiaqatigiinni ineriartorneq kinguneqarsimavoq, aaqqissuusseqqinnissat aningaasarsiutillu nutaat pisariaqalersimallutik, maannamutut siunissami atugarissaaginnassagaanni.
Taama neqerooruteqarneq inersuarmi partiinit isumaqatigineqarpoq.
Dansk Folkepartiimili Kalaallit Nunaata aningaasaqarnera Nunatta siunissaanik eqqartuinermut sangutinneqarpoq - namminersulernissaq ilanngullugu.
Dansk Folkeparti: Qaa Kalaallit Nunaat aallartinniarit
Oqallinnermi partiip Nunarput pillugu oqaaseqartartua Søren Espersen sangutitsivoq aaqqissuusseqqinnissanik eqqartuineq tunullugu. Allaammi oqarpoq, qanittoq tikillugu Nunatsinni aaqqissuusseqqittoqarsimanngitsoq.
- Qaa Kalaallit Nunaat pisimasut pingaartillugit ajunngitsumik aallartinniarit. Sinnattuaqiunnaarlusi aaqqissuusseqqinniaritsi pisinnaasassinnillu takutitsillusi. Namminersortunngupallanniaritsi, kisianni oqallisiginagu.
Taama oqarnerata kalaallit Folketingimi ilaasortat eqiiallatippai - Siumumeersup Doris Jakobsenip eqqaasitsissutigaa, namminersortunngorneq arlalinnik periarfissaqarmat:
- Periarfissat ilagaat Free Association, kalaallillu tamanna kissaatigippassuk soorlu illersornissaq eqqarsaatigalugu nunanik allanik suleqateqarnikkut pisinnaasoq, taanna oqarpoq.
Ministeriuneq oqarpoq nammineq naalagaaffeqartigiinneq tapersersorlugu, Kalaallit Nunaalli namminersulerusuppat tamanna akueriumaarlugu.
Oqallinnerup nalaani ministeriunerup erseqqissarpaa, naalakkersuisut kalaallit EU-mut puisit amii pillugit sorsunneranni tapersersorai, aammalu Pituffimmik kiffartuussinissaq pillugu USA-mik isumaqatigiinniarneranni.