Naalagaaffeqatigiinneq allanngoriartorpoq

- Kalaallit Nunaata siunissami aningaasarpassuarnik isertitaqartalersinnaanera piviusunngorpat piviusunngunngikkaluarpalluunniit Danmarkimi Kalaallit Nunaata eqqartorneqartarneranik allannguereerpoq, kalaallillu Danmarkimut isiginninnerannik aamma allannguilluni. Atuakkiaminik, sisamanngorpat saqqummersitsisussaq, Martin Breum taama oqarpoq.

Atuakkami taaguuteqartumi ’Når isen forsvinder’ (Sikueruppat). Danmarkip issittumi politikkia sammineqarpoq, aamma Danmarkip Kalaallit Nunaatalu akornanni ukiuni kingullerni pissutsit eqqartorneqarput.

- Danmarkimi isumaqartoqarpoq kalaallit aningaasaqarnikkut politikkikkullu namminersulivinnissaminnut piareersartut. Tamanna eqqortuusariaqanngilaq, qallunaarpassuilli taama eqqarsarput. Tamannalu pissutsinik najummassimanartitsilersinnaammat naalagaaffeqatigiinnerup iluani qanoq inissisimanerluta ammasumik oqallisigisariaqarparput, Martin Breum oqarpoq.

Ineriartornermi pisut kalaallit qanoq isumaqarfigineraat Martin Breumip paasiniarsimavaa, qulakkiivillugulu oqaaseqarsinnaanngikkaluarluni isumaqarpoq qallunaat kalaalliniit Nunatta namminiilivinnissaa eqqarsaatiginerugaat.

- Kalaallit amerlanerujartuinnartut naalagaaffeqatigiinnermik ersarissumik sinaakkusilikkamik ataannartitserusuttut isumaqarpunga. Naalagaaffeqatigiinnerup iluaniiginnarluni kisiannili soorunami tulluarsaalluni sinaakkutinillu ineriartortitsilluni, Martin Breum oqarpoq.

Martin Breumip atuakkiaa ullutsinni siunissamilu Danmarkip Kalaallit Nunaatalu akornanni pissutsit pillugit oqallisissiaavoq.