Naalagaaffeqatigiineq nutartertuarneqassaaq

Danmarkimi naalakkersuisut naalagaaffeqatigiinnerup nutartertuarnissa ingerlatiinnarniarpaat. Oqartussaaffeqarfiit Nunatsinnut Savalimmiunullu nuussorneqassapput, aningaasartuutilli nammineq akisussaaffiginerujartortariaqarlugit,  ministeriuneq Anders Fogh Rasmussen, ullumi Folketingimi ataatsimiinneq aallarnerlugu oqalugiaateqarpoq.

Naalagaaffeqatigiinneq nutaaliaasoq ministeriunerup Anders Fogh Rasmussenip nalilerpaa. Nutaanngorsaanissamullu alloriarneq siulleq tassaavoq Nunatsinni Savalimmiunilu naalakkersuisunut nunanut allanut oqartussaanermik tunniussinissaq, neriorsuut piviusunngortinnissaanut siunnersuusiorneqareersoq.

Naalagaaffiup qularnaveeqqusigaanik Nunarput Savalimmiullu nunanut allanut tunngasunik akisussaaffeqaleriartussapput, avammullu attavissat sanarfissallugit.

Oqartussaaffeqarfiit pingaartut Savalimmiut oqartussaaffigilertussanngorpaat, tassalu eqqartuussiveqarneq, pinerlussimasunik isumaginninneq, ilaqutariillu pillugit oqartussaaneq, kiisalu nunami allamiunut apeqqummut oqartussaaffeqarfiit. Inatsisit tunngaviusut sinnernagit oqartussaaffiit Savalimmiunut nuunneqassapput, qanorli pilertortigissanersoq Savalimmiormiut namminneq aalajangissavaat, statsministerilli erseqqissaatigaa aningaasanik ilaqassanngitsoq.

Nunarput pillugu namminersulivinnissamut ataatsimiititaliap Nuummi ataatsimeerngaarnera  ilisimatitsissutigaa.

Danmarkimi naalakkersuisut Nunatsinnilu Namminersornerullutik Oqartussat namminersulivinnissamik anguniagaqarnermi ataatsimiititaliamik pilersiteqqammerput, namminersulivinnisarlu suleqatigiinnikkut naalagaaffeqatigiinnerup iluani anguniarneqassasoq Anders Fogh Rasmussenip oqaatigaa.