Naalagaaffeqataalernissamut periarfissat marluinnaat
Atuagaq nutaaq saqqummiunneqalersoq naapertorlugu, Danmarkip nunarput soqutigalugu naalagaaffimmini ukiut 50-it matuma siornagut ilanngukkusussimagaluarpaa, naak nunatsinnit tamanna annerusumik kissaatigineqarsimanngikkaluartoq.
Inatsisilerinermik professorit Ole Espersen aamma Gudmundur Alfredsson atuakkiortuupput, Folketingimilu Atlantikup Avannaani Qinikkat Suleqatigiiffiat suliamik aallartitsisuulluni.
Atuakkiortut allapput, Danmarkip nunarput marlunnik periarfississimagaa, tassalu naalagaaffimmut ilaalernissaq imaluunnit namminersulernissaq.
Naalagaaffiilli Peqatigiit isumaqatigiissutaat naapertorlugu Danmark allamik aamma periarfissiisussaasimagaluarpoq, tassalu nunarput Danmarkimik qanimut suleqateqarluni namminersortutut ingerlalersinnaasoq, Danmarkili tamatuminnga periarfissiisimanngilaq.
Atuagaq tusagassiortunik katersortitsinermi Københavnimi sapaatip-akunnerata tulliani saqqummiunneqassaaq.
