Naajavaarsuk timmissani mingutsitaanerpaavoq
Issittumi timmiaq, naajakkut ilaat, timmissani nunarsuarmi mingutsitsinermit eqqugaanerpaaq siumorneqarpoq. Norgip avannarpasissuani Siberiamilu naajavaarsuup mannii katersorneqartut akuutissanik arrortikkuminaatsunik PCB-nik DDT-millu, Nannuni ukiut 20-t matuma siornatigut nassaarineqartunisut annertussusilinnik, mingutsitaasimatigipput.
Allattoq Louise M. Kleemann
septembarip 05-at 2008 10:26
Tuluit nutaarsiassaqartitsiviat Reuters taama allaaserinnippoq.
- Naajavaarsuk saarullinnik aalisakkanillu allanik orsoqarluartunik nerisaqartuuvoq. Naajavaarsuk aamma silutuumasuummat, akuutissat arrortikkuminaatsut tamakkunuunatigut pissarsiarisarai, Halvard Ström, Norgip issittunik misissuisoqarfianeersoq, oqarpoq.
Akuutissat DDT aamma PCB Naalagaaffiit Peqatigiit aalajangersaanerisigut 2001-imi inerteqqutaalerput.
Naajavaarsuit 14.000-it missaat Siberiaminngaanniit Canadamut maanna uumasuupput. Nunarsuup kiatsikkiartornerata kingunerisaanik uumaffigisinnaasaat ullumikkut killeqartorujussuanngorput.
