Naajat suliffissuarmut isertalerput
- Qanoq ililluni naajat ikilisarneqarsinnaanersut siunnersuutissaqaruit tikilluaqqusaakutsoorputit.
Taama nalunaaruteqarpoq Jan Erik Andersen Qaasuitsuip Kommuniani atorfilik innuttaasut arlallit ajornartorsiut taanna pillugu saaffiginnittareersut.
Ajornartorsiut inissiat akornanni takussaavallaanngila taamaattorli umiarsualivimmi unammisunik marlunnik suliffissuaqarfiusumi ajornartorsiut takussaalersimalluni.
- Naajat ima nujuitsigilersimapput allaat tunisassiorfiup iluanut isertalersimallutik, Royal Greenlandip Ilulissani suliffissuani pisortaq Niels Ole Møller KNR-imut oqarpoq.
- Sulisuttat ilaat kiinnamigut naajamit kiitissimavoq naajaq silammut ungoorniartillugu, Niels Ole Møller oqarpoq.
Taamaattumik Qaasuitsup Kommunianut saaffiginnissimavoq. Taakkuli iliuusissaaleqipput illoqarfiup iluani aallaasersorneq inerteqqutaammat.
- Aaqqiissutissamik ujarlerpugut. Kisianni qanoq iliuuseqarnissaq ajornakusoorpoq illoqarfiup iluani aallaasersorneq inerteqqutaammat. Taamaattumik iliuusaasinnaasunik isumassarsiat tamarmik tikilluaqqunaqaat, Jan Erik Andersen oqarpoq.
Royal Greenlandimit aarleqqutigineqarpoq ajornartorsiutip tunisassiornermik eqquinerlussinnaanera.
- Avannaata teriarsuinik uanga taarusuppakka. Timmissat anaat ajornartorsiutaalereerput umiarsualivimmi illorsuit qaavini takussaasupilussuugamik. Uangattaaq tusarusuttorujussuuara tamanna qanoq aaqqiivigineqarsinnaanersoq, Niels Ole Møller oqarpoq.
Royal Greenlandip unammillertaata Halibut Greenland aamma ajornartorsiut tamanna akiorniarpaa.
- Inuussutissanik tunisassiortuugatta eqqiluisaarnissamut malittarisassat sakkortuut malippagut. Taamaattumik ajornartorsiutip qanoq iliuuseqarfigineqarnissaa assut kissaatigaarput, Halibut Greenlandimi pisortaq Niels Thomsen KNR-imut oqarpoq.
Ajornartorsiut tamanna Ilulissani taamaallaat atuutinngilaq. Qeqqata Kommunia, Kommuneqarfik Sermersooq, Kommune Kujalleq aamma naajanik tulukkanillu ajornartorsiuteqarput.
Kommune Kujalleq Qaqortumi eqqaavissuarmi naajanik tulukkanillu toqoraatitsivoq. Kommuneqarfik Sermersuumi innuttaasut kajumissaarneqarput eqqaaviit containerit matunissaat eqqaamasaqqullugu. Containeri ammasoq erngerluni tulukkanit naajanillu takuneqartarpoq ajornartorsiullu pilersarluni.
