Naajarniarneq unitsikkallarpaat
Kommune Kujallermiut aalajangerput pullaserluni naajanik ikilisaaneq unitsikkallarneqassasoq, paasinarsimmat tamanna timmissat pillugit nalunaarummik unioqqutitsinerusoq. Immikkut akuersissummik kommune maanna pissarsiniarpoq.
Ilulissaniinnaanngitsoq naajat inunnut saassussisalersimapput. Tamanna aamma Qaqortumi nalaanneqarsimavoq.
- Piniartut ilaat puisimik pilattilluni naajamit kiinnamigut pukunneqarsimavoq, Kommune Kujallermiit Otto Kielsen oqaluttuarpoq.
Naajanut pullatit Nanortalimmi Qaqortumilu ilineqarput taamaasillunilu naajarpassuit toqunneqarlutik. Namminersorlutilli Oqartussat KNRimut ilisimatitsissutigaat tamanna timmissat pillugit nalunaarummik unioqqutitsinerusoq tassanimi timmissat qanoq piniarneqartarnissaat aalajangersarneqarsimammat.
- Naajanik Tulukkanillu ikilisaanissaq siunniunneqarmat uumasut nakorsaat Qaqortumiittoq isumasioqatigalugu pisimavoq. Taassuma qanoq isiorluni timmissap toqukkasuarneqarsinnaanerat eqqumaffigeqqusimavaa. Naatsorsuutigisimagaluarparput pineqartoq Aalisarnermut,Piniarnermut Nunalerinermut Naalakkersuisoqarfiup ataani atorfeqarmat maleruagassat malillugit aallariarfeqarnerput, Otto Kielsen oqarpoq.
Kommune Kujalleq sapaammi nalunaarpoq pullaserluni naajanik ikilisaaneq unitsikkallarneqartoq. Naajarniarnerli nangeqqinneqassaaq immikkut akuersissutit pisariaqartinneqartut pissarsiarineqariarpata. Tulukkat naajallu kisimik kujataani ajornartorsiutaanngillat. Nattorallit aamma inunnut qaninngoortalersimapput.
