Naajanik toqoraanissaq akueraat

Namminersorlutik Oqartussat immikkut akuersissuteqarput Nanortalimmi pullatit atorlugit naajanik toqoraanissamut.
Allattoq Noah Mølgaard
februaarip 20-at 2012 11:13

Timmissat pillugit nalunaarut pissutigalugu Nanortalimmi naajanik toqoraaneq unitsinneqaraluarpoq. Januaarimi pullaserluni naajanik toqoraanermi nalunaaquttap akunnerisa marluk ingerlanerinnaanni naajat 52-it toqunneqaraluarput. Timmissalli pillugit nalunaarut naapertorlugu pullaserluni timmiarniarneq nunatsinni inerteqqutaavoq.

- Maanna Namminersorlutik Oqartussanit immikkut akuerineqarpugut ukiuni tallimaagallartuni pullatit atorlugit naajanik Nanortalimmi toqoraanissamut, Kommune kujallermi aqqusinerilerisut pisortaat Otto Kielsen KNR-imut oqarpoq.

- Qinnuteqarnitsinni  Mittarfeqarfinnit taperserneqarsimavugut. Eqqaavissuaq heliportimut qanittumiittoq naajarpassuaqartarmat isumannaallisaaneq eqqarsaatigalugu naajarpassuit ulorianarsinnaasut nalilerneqarsimavoq, Otto Kielsen, nassuiaavoq.

Silaannakkut angallanneq pissutigalugu Namminersorlutik Oqartussat immikkut akuersissuteqarput.

Kommune Kujallermit naatsorsuutigineqarpoq pullatit aqagu inissinneqarumaartut. Pullaserluni naajarniarneq septemberip aallaqqaataaniit apriilip 30-iata tungaanut ingerlanneqartassaaq.