Naaja: Sanaartornermut inatsit silap pissusianut naleqqussarneqassaaq
Taamatullu oqaaseqarnera Naaja Nathanielsenip IA-meersup nuannaarutigaa, inatsisillu maanna atuuttup allanngortinneqarnissaa kissaatigalugu.
- Ujartukkama allannguinermut ilanngunneqarnissaat neriuutigaara. Tassalu Issittumi sanaartornerup sammineqarnerunissaa nakkutilliinerullu annertusarneqarnissaa pitsanngorsarneqarnissaalu. Malittarisassammi ullumikkut atuuttut pitsaasuunnginnerisa kingunerisaannik oquttoqarneranik sannarluttoqarsimaneranillu suliat takujuarpagut, Naaja Nathanielsen oqarpoq.
Naalakkersuisut sanaartornermut inatsisip aamma illuliat pillugit malittarisassat allanngortinneqarnissaannut tigussaasunik pilersaaruteqarnersut illuatungiulittunit apeqqutigineqarsimavoq, taamaaliortoqarneratigut siunissami sanaartukkat sannarluttoqannginnissaanut qulakkeerneqarnissaat anguniarlugu.
Ineqarnermut naalakkersuisoq ilaatigut naatsorsuutigaa isugutammik oqummillu ajoqusertoqannginnissaa qulakkeerniarlugu 2015-imi illuliat pillugit nutaanik malittarisassiortoqarsinnaassasoq.
- Illuliat pillugit malittarisassat nutaat atuuttussanngortinneqannginnerini suliaqartuusut peqatigalugit oqqartueqatigiinnissat neriuutigaara. Tamakkuninnga suliaqartuusut oqaloqatigineqarlik, taamaaliornikkummi oqaaseqaateqarnissaminnut sunniuteqarnissaminnullu periarfissaqassammata, Naaja Nathanielsen oqarpoq.
Naalakkersuisuusimasut sanaartornermik nakkutilliinerat iluatsippallaarsimanngilaq. Oquttoqarneranimmi sannarluttoqarsimaneranillu suliat ulluinnarsiutaapput.
Silap pisussiata allanngoriartornera unamminartut ilagivaat. Taamaammat Naaja Nathanielsen isumaqarpoq inatsisissaq silap pissusianut naleqqussarneqartariaqartoq.
- Sanaartornermut malittarisassiavut silap pissusiinut assigiinngitsupilussuarnut naleqqussarneqartariaqarput. Nanortalimmiimmi Qaanamut silap pissusii assigiinngitsorujussuupput eqqumaffigisariaqakkallu aamma assigiinngitsorujussuullutik, Inatsisartunut ilaasortaq Naaja Nathaliensen taama oqarpoq.
