- Pineqaatissinneqarsimasunut inissiisarfinni inissat amerlanerusut pisariaqartinneqarput, kissaatigineqartorlu tamanna saqqummiunnikuuarput. Naaja Nathanielsen taama oqarpoq Assi: Naalakkersuisut.

Naaja Nathanielsenip pineqaatissinneqarsimasunut inissiisarfiit inissaqarnerulernissaat kissaatigigaa

Danmarkimi naalakkersuisut pineqaatissinneqarsimasunut inissiisarfimmiitsitsinissamut utaqqisarnerup sivikkililnissaa, Inatsisinik atuutsitsinermut naalakkersuisup ersarissumik naatsorsuutigaa.

Pineqaatissinneqarsimasut 70-it pineqaatissineqarsimasunut inissiisarfimmiitsitsinissamut inissaqartitsinnginneq pissutigalugu inuiaqatigiini inooqataapput 

Tamanna KNR-ip novembarimi allaaseriaa, ajornartorsiutaasorlu taanna nutaajunngilaq.

Ajornartorsiutaasorli ukiup kingulliup ingerlanerani anneruleraluttuinnarpoq, Naaja H. Nathanielsenillu kisitsisit taakku ikilisinnissaat inatsisinik atuutsitsinermik naalakkersuisutut maluginiarneqartussanngortippaa.

Taamaammat tamanna danskit inatsiseqarnermut ministerianik, Nick Hækkerupimik sapaatit akunnerata siuliani siullermeertumik ataatsimeeqateqarnerani oqaluuserisassaniippoq.

- Tamatuma aaqqiivigineqartoqarnissaanut piginnaassuseqartoqarnerunissaa pisariaqarpoq, kissaallu taanna oqaatigaarput, Naaja Nathanielsen ataatsimiinneq pillugu KNR-imut taama oqarpoq.

Maannakkut iliuuseqartoqarnissaa kissaatigigaa

Inatsiseqarnermut oqartussaaffik danskit akisussaaffigisaanniimmat suliniutinik naleqquttunik atulersitsinissaq danskit naalakkersuisuisa Folketingillu maanna iliuuseqarfigissavaat.

Naaja H. Nathanielsenili qanoq pisoqarnissaanut atatillugu isumalluarpoq.

- Danskit tungaanninngaanniit utaqqisunut allattorsimaffimmiittut ikilisinneqarnissaat naatsorsuutigaaraa, kisianni qanoq iliornikkut iliuuseqassanersut suli ilisimanngilara, naalakkersuisoq oqarpoq, nangillunilu:

- Kisianni nunatsinni pineqaatissinneqarsimasut utaqqisuniittut amerlanerat akuersaarneqarsinnaanngilaq, sulisussanilli amigaateqarneq imaluunniit allamik nassuaateqaannarneq naleqqutinngilaq.

Folketingimi pinerluttunik isumaginninnermik maanna isumaqatigiinniartoqarpoq. Suliniutinik ilalimmik aamma nunatsinnut attuumassuteqartunik takkuttoqarsinnaalluarpoq.

Pineqaatissiisarneq sivitsorneqassasoq

Inatsiseqarnermut susassaqarfik danskit akisussaaffigigaluarpaat tamanna Naalakkersuisuni ukkatarineqangaatsiartoq, Naaja H. Nathanielsenip ataatsimiinnermi erseqqissaatigisimallugu oqaatigaa.

Naalakkersuisut ilungersunarluinnartumik pinerluuteqarnerni pineqaatissiissutaasartup ukiunik qulinit 16-inut sivitsorneqarnissaa kissaatigigaat ataatsimiinnermi uteqqissimavaa.

Danmarkimi naalakkersuisut tamanna naammassiniaraat taamaalillunilu atuutilissasoq nalunaarutigineqarpoq.

Qaquguli tamanna pissanersoq suli ilisimaneqanngilaq.

- Tamanna qaammatini aggersuni malinnaavigissavarput. Tassungali aaqqiissuteqartoqapallannissaa nalinginnaasumik kissaatigaarput, inatsisinik atuutsitsinermut naalakkersuisoq oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl