Naaja Nathanielsen: Suleqataarusuppugut
IA ukiuni sisamani pissaanerup qiterisaaniissimanermi kingorna maanna illuatungiliuttutut sulinissaq sungiunniartussangorpaa, sapinngisamillu siammasinnerpaamik isumaqatigiissusiortoqartarnissaa anguniarniarpaa. Aqqut suna siunissami atorneqassanersoq siammasissumik isumaqatigiissuteqartoqartarpat nunamut pitsaanerpaassaaq.
-Naalakkersuisoqarfiit allaaffiini nutaajunitsinni siammasissumik suleqatigiinnissamut ingerlaannaq qaaqqusivugut, taamanili illuatungiliuttut peqataajumanngisaannarput. Allatut iliorusunnerupput, uagulli nunatta siunissaa pillugu suleqatigiinnissaq ammaffigaarput. Inatsisartuni aalajangiinerit qinersisartut tunuliaqutarineqartut amerlanerpaatikkaanni, aamma tunngavissaqarnerussapput, Naaja Nathanielsen knr.gl-imut oqarpoq.
Inuiaqatigiilli siunissami aqqummik sumik atuinissannut paasissutissanik naalakkersuisooqatigiilersut IA-mit pissarsiffiginissaat iluatsissimanngilaq. Tamannalu Naaja Nathanielsen uggoraa, taassumami ukiakkut ataatsimiinnissamut suut piareersaateqarfigineqassanersut paaserusukkaluarpaa.
-Inatsisartut ataatsimiinnissaannut siunnersuutissanik suliaqalereerpugut, sattaaserlutali piareertariaqarnerput pitsaasuunngilaq. Partiimmi naalakkersuisuutitaqartut aqqutissatut kissaatigisaannit allaanerujussuarmik suliaqaratarsinnaavugut, taamaattoqassappallu suleqatigiinnissaq ajornakusoortupilussuussalluni. Naalakkersuisunngortut naalakkersuisooqatigiinnissamik isumaqatigiissummi qulequtaannarnik saqqummiussinatik piffissami qaninnerpaami allanik saqqummiussaqarnissaat kissaatigigaluarpara, Naaja Nathanielsen oqarpoq.