Naaja Nathanielsen: Nukissiorfiit piumasaqaataat naapertuutinngilaq

Taakkulu attaveqarnermut Naalakkersuisoq Jens B. Frederikseni naapertorlugu Qaqortumi Narsamilu innaallagissamik atuisut akilissavatat.

Taama akisutisineq IA sinnerlugu inatsisartumut ilaasortamit Naaja Nathanielsenimik §37 naapertorlugu Jens B. Frederiksenimut apeqquteqarsimasumut iluarinenanngilaq

- Nukissiorfik nammineq kukkussutaanik peqquteqartumik aningaasartuutaasussanut atuisut akiligassinneqartarnissannik periaasearneq ajornartorsiutitut isigaara. Uani pineqartumi aningaasarpassuit atuisunik akilerneqartussanngorsinnaapput, Naaja Nathanielsen oqarpoq.

Taanna isumaqarpoq, Nukissiorfiit sanaartortinneqartullu akornanni aaqqiagiinnginnermut atatillugu aningaasartuutinut Qaqortumi Narsamilu innuttaasut akiliisussaanerat pillugu aalajangersakkat sorliit tunngaviunersut ersernerluttoq.

Tamatumunnga 2006-imi nalunaarummi innaallagissamut, imermut ataatsimullu kiassarnermut aningaasartuutit agguarneqarnissaannut tunngavissanik aalajangersaasarnermut maleruagassat Nalakkersuisunut ilaasortaq Jens B. Frederiksenip innersuussutigaa.

Naaja Nathanielsenili isumaqarpoq, nammineq isumaa naaperlugu Nukissiorfiit kukkunerisimasaanut atuisut akiliissappata, naapertuutinngitsoq.

- Atuisut innaassagissamik, imermik kiassarnermillu tunngavissasiornermi najungarisami aningaasartuutinut akileeqataassappata  ajorinngilluinnarpara.

Kisianni assersuutigalugu Nukissiorfiup kukkussuteqarneratigut immikkut aningaasartuuteqassatillugu, atuisut akiligassinneqartarnissannik periaaseqarneq ajornartorsiutitut isigaara, Naaja Nathanielsen oqarpoq.

Nukissiorfiulli suliamik aallartitsisimanera atuisut soqutigisarilluinnaraat, Jens B. Frederiksenili allappoq:
- Suliamut aningaasartuutit ilaatigut erngup nukinganik innaallagissiorfiup sananeqarneranut akiligassat ilassutigisinnaasaannik killiliiniarnermut atorneqartussaammata. Saniatigut akiligassanngorsinnaasut taakku aamma Narsami Qaqortumilu atuisut akilertussanngortussaavaat, Jens B. Frederiksen akissummini allappoq.

Taassumali aamma ilumornerarpaa, aaqqiagiinngissut suliassanngortinneqarsimanera Narsami Qaqortumilu innuttaasut pisuussutiginngimmassuk, akinilli aaqqissuusseriaatsip maanna atuuttup politikerinit aalangersagarineqarsimanera innersuussutigalugu.

Inatsisartullumi innaallagissamut, imermut kiassarneqarnermullu akilersuiaaseq qanittukkut suliarisussanngorpaat, atorfilllillu  Nukissiorfiit suleqatigalugit maanna piareersaapput.

Jens B. Frederiksenip aamma erseqqissaatigerusuppaa, akit ilusaat maanna atorneqartut atorlugit, suli najugaqarfiit assigiinngitsut akornanni nammaqatigiinneq annertooq atorneqarmat.

Nukissiorfiit sanaartortullu aaqqiagiinngissutaasa qanoq inerneqarumaarnera Jens B. Frederiksenip eqqoriarumanngilaa. Erseqqisarpaali:

- Suliami matumani Nukissiorfiit taperserneqassappata, aammalu suliamut aningaasartuutit ilaannik akiliisussanngortinneqassappata, tamanna aamma agguaanissamut naatsorsuutinut ilaatinneqartussaavoq, aammalu atuisunut iluaqutissanngortinneqartussaalluni, Jens B. Frederiksen oqarpoq.

Inatsisartuni ilaasortap Naaja Nathanielsenip Naalakkersuisup Jens B. Frederiksenip akissutaa naammaginnginnamiuk apeqqutinik nutaanik nassiusseqqippoq, naatsorsuutigaalu ukiumi nutaami akissuteqarfigineqarumaarluni.