Naaja Nathanielsen atorfittaani pillugu: Nutaanik sammisaqarusussuseqarpunga
- Soorunami nutaanik sammisassaqarusussuseqarpunga suliakkiissutillu merserinagit.
Naaja Nathanielsen (IA) parteeqatini Asii Chemnitz Narup ippassaq tunuartoq paarlallugu aningaasaqarnermut naalakkersuisunngortoq oqarpoq.
Asii Chemnitz Narup Kommuneqarfik Sermersuumi borgmesteriutilluni inissianut atatillugu sakkortuumik isornartorsiorneqarnermi kingorna naalakkeersuisuunerminit tunuarpoq.
AAMMA ATUARUK Asii Chemnitz Narup trækker sig som naalakkersuisoq for finanser
- Pisut tunuliaqutaat uggorigaluarpara, Naaja Nathanielsen oqarpoq, nutaanilli suliaqarnissaminut periarfissinneqarnini nuannaarutigalugu erseqqissarpaa.
- Suliassat inuiaqatigiinnut tamanut qitiulluinnartumik inissisimapput, tusaalluarnissamik suleqatiserinnikkusunnermillu piumaffiginaraluarlutik aamma pisariaqaleraangat killiliisinnaasariaqarluni.
Allanngujuissuseq pisariaqarpoq
Taanna oqaluttuarpoq, atorfittaani soqutigineraa qanittukkut aperineqarsimalluni.
- Uangalu angerpunga, naalakkersuisooqatigiinnitsinni pissutsit nalorninarsingaluartut inuiaqatigiit allanngujuissusermik takutillugit suliatta nangissinnaaneri pingaartuummat. Tamatumunnga peqataarusuppunga, , siornatigut aatsitassaqarnermut, inatsiseqarnermut, ineqarnermut, attaveqaasersuutinut naligiissitaanermullu naalakkersuisooreersoq, Naaja Nathanielsen oqarpoq.
Ineqarnermut attaveqaasersuutinullu tunngasut, naalakkersuisut akornanni nutaartap Mariane Paviasenip (IA) naalakersuisuuffigilerpai.
AAMMA ATUARUK Mariane Paviasen naalakkersuisunngortoq
Sinnerili Naaja Nathanielsenip tigummiinnasavai. Taavami suliassani nutaat qanoq ingerlakkusuppai?
- Maannamut suleriaaserisara attatiinnassavara. Aaqqissuulluakkamik sulinissaq sammisallu immikkut tamarmik killiffiiniit ineriartortinnissaannut piareersimanissaq pingaaruteqarpoq. Aaqqissuulluakkamik sulisinnaaneq soorunalumi piffissaq pisarialik atorlugu sulerusussuseqarneq pingaaruteqarput.
Suliassat ilaasa puigornissaat aarleqqutiginngiliuk?
- Sammisaqarfiit ilaasa annikinnerusutut nalilernissaat ilimagingaluarukku, sammisat taama amerlatigisut tigunissaannut angersimanavianngikkaluarpunga.
Kingoraakkani qutsavigaa
Aningaasaqarnermut akisussaasutut nutaajuvutit. Aningaasaqarnermulli atatillugu suut immikkut aalluterusunnerlugit eqqarsaasersuutigereerpiuk?
- Naamik, ullumi tamakkua saqqummiukkusunngilakka. 2023mi aningaasanut inatsisissaq ungasinngitsukkut suliarilertussaavarput, tassungalu atatillugu suliassat aallaqqaataaniit sunneeqataaffiginissaat qilanaaraara, Naaja Nathanielsen oqarpoq nangillunilu:
- 2022mut suliassat Asii Chemnitz Narupip suliarilluarsimavai, tamannalu uannut oqilisaataassaaq. Tamanna assut qujassutigaara.
Asii Chemnitz Narup naalakkersuisutut tunuaraluarluni politikeriuneq qimassanngilaa. Taanna Inatsisartuni ilaasortatut ingerlaqqiinnassaaq.