Naaja Nathanielsen: Aalajangiineq iluaraara sulialli ingerlanneqarnera iluarinagu

Taama oqaasertaliillutik Inatsisartut Aningaasaqarnermut Ataatsimiititaliaata, Royal Arctic Linep aamma Royal Bygdeservice-p umiarsuarnik, katillugit 700 million koruuninik akilinnik, Tysklandimiit pisinissaannut Naalakkersuisut aningaasaleeqataanissaminnut qinnuteqaataat uparuarpaat.

Ataatsimiititaliaq atatsimoorussillutik uparuaagaluartut taamaattoq Naalakkersuisooqatigiit aataatsimiititaliami ilaasortaatitaasa pingasuusut aningaasaleeqataanissat akuersissutigaat, illuatungiliuttut ilaasortaatitaasa marluusut itigartikkaat:

Politikkikkut aalajangiineq tutsuiginarpianngitsoq aammalu inuiaqatigiit akileraarutaannik 535 million koruuninik atuiffiusoq. Aamma taama aalajangiinerup pilersissinnaava, immakkut angallassinerup pisoqalisup attatiinartariaqalerneranut.

Assartuussinerup aaqqissuussaanera maannakkutut ittup ingerlatiinnarneqarnissaanut Naalakkersuisut aamma allaffissornermi qitiusoqarfik suliaqarnerarlugu Aningaasaqarnermut ataatsimiititaliap toqqaannartumik taama oqaatigaat. Taamatullu siunniussaqarneq inuiaqatigiinnut oqallisissiassanngortinnaguluunniit aamma ilisimasalimmut arlaannaannulluunniit attuumassuteqanngitsumut misissortinnagu aammalu suliffeqarfinnut piginneqataasunut aalajangiinermi tunuliaqutit misissorneqarnissaannut periarfissiisoqarsimanani akerliliinissamullu taakku periarfissiisoqarsimannginnera Ataatsimiititaliap assuaraa, naammaginanngilluinnartutullu ataatsimiititaliamit tamarmiusumit isumaqatigiissutigineqarluni. Imaluunniit Ataatsimiititaliami siulittaasup, Naaja Nathanielsenip oqarnera malillugu ima oqaatigineqarluni.

- Assuarisarput tassaavoq, pisoq 2004-mili ilisimaneqalermat qanorlu iliuuseqartoqarsimanani. Tassalu uangut maanna piffissaq sivikitsunnguaq atorlugu aalajangertariaqalernitsinnut tamanna pissutaalluni. Aamma Naalakkersuisunit suliap qanoq ingerlaneranik nalunaarfigineqartarsimanngilagut. Tassalu sulinerup arriippallaamik ingerlanneqarsimanerata kinguneraa umiarsuarnik nutaanik pisisariaqalernerput, Naaja Nathanielsen oqarpoq.

Assartuussinerup isumaqatigiissusiornerani tamanna ukiuni 20-ni atuuttussanngorlugu isumaqatigiittoqarsimavoq, tamannarpiarlu pissutigalugu assartuussineq nutarteriffigineqarsinnaarpiarunnaarsimalluni, tamanna pillugu Aningaasaqarnermut ataatsimiititaliap siulittaasua ima oqarpoq:

- Isumaqatigiissutip allanngortinneqarnissaanut periarfissiisimaneq maluginiarparput, tassalu Royal Arctic Line-mit malugineqarsinnaalersimappat assartuussinermi siunniunneqarsimasut ilorraap tungaanut aallarsimasut taava nutaamik isumaqatiginniuteqarnissaq ammaanneqarluni. Tassalu isumaqatigiissummi piffissaliussaasoq ukiuni 20-ni atuuttussaq sivikillisinnaanngorlugu nunami pissutsit allanngorsimappata, Naaja Nathanielsen oqarpoq.

Ilisimaneqalereersutut illuatungiliuttut Siumukkormiut ilaasortaatitaat marluusut aningaasaliinermut 535 million koruuninik annertussulimmut isumaqataanngillat. Taakku isumaqarput Royal Arctic Line umiarsuarnik attartortariaqartoq, attartornerullu nalaani periarfissanik allanik misissuisoqaqqullugu, taamaattoqareerpallu misissuinerup inernera Aningaasaqrnermut ataatsimiititaliamut saqqummiullugu.

- Attartornissamik aalajangiineq pisinermik suli akisunerulissaaq, Naaja Nathanielsen oqarpoq, nangillunilu:

- Naalakkersusisut siunniussaat akikinnerpaatut uangut nalilerparput, taamaattumiguna tamassumunga isumaqataalluta taasisugut. Sulili pitsaanerusimasinnaagaluarpoq, tassa qangali pissutsit aaqqinneqarsimasuuppata, Naaja Nathanielsen oqarpoq.

Taassuma ilanngullugu oqaatigaa Naalakkersuisoqatigiinnit Aningaasaqarnermut ataatsimiititaliaanni ilaasortaatitaasut kimigiiserfigineqarsimanngimmata.

Naaja Nathanielsen aperaarput taama aalajangiinermut naammagisimaarinninnersoq, akivorlu.

- Aalajangiineq iluaraara, sulialli ingerlanneqarnera iluarinagu.