Assi ToqqorsivimmitAssi: KNR

- Naagga kalerrisaarineq kukkunerunngilaq: upalungaarsimanermut pilersaarut malinneqarpoq

Timmisartup minnissaanut minutsit 20-t sioqqullugit, nalinginnaasumik periusaasarpoq silaannakkut kalerrisaarinerup aallartinneqartarnera, Isumannaallisaaneq pillugit ullaaq manna mittoqarnera arlalissuarnik itertitsisoq Mittarfeqarfimmit taama nassuiarneqarpoq

Sapaatip ullaavani Nuummi innuttaasut upalungaarsimanermut kalerrisaammik itersarneqarput. 

Nuummi politiit naapertorlugit "kukkusoqarsimagunarpoq", taamaattoqanngitsorli Mittarfeqarfiit nalunaarput. 

Air Greenlandip timmisartua Dash-8 GL1540, Nuummiit Kangerlussualiartoq motorerliulerami uterpoq sillimaniarnerlu pillugu minnissamut piareersarluni, Taamaammallu kalerrisaarut Nuummi aallartinneqarpoq. 

- Timmisartumi aquttup motorip ajoquteqarnera paasigamiuk motori qameriarlugu Nuummut uternissaq aalajangiuppaa. Nuummilu mittarfimmut motori ataasiinnaq atorlugu isumannaallisaatitut mippoq. Ilaasut timmisartumilu sulisut tamarmik ajunngillat, Air Greenlandimi timmisartuussinissanut pisortaq John Nielsen oqarpoq.

AAMMA ATUARUK Upalungaarsimaniarneq Nuummi unitsinneqarpoq - kukkusoqarsimagunarpoq

Timmisartoq isumannaatsumik nal. 08.02 mimmat, Nuummi qatserisartut Mittarfeqarfiillu upalungaarsimatitaat piareersimapput.

Mittarfeqarfimmi attaveqaqatigiinnermut pisortaq Malene Lynge naapertorlugu sillimaniarnermi periusissaq malinneqarpoq. Taamaammallu sapaatip ullaavani nuummiorpaaluit karrisaarutip nipaa itissutigaat. 

- Taama pisoqartillugu timmisartup minnissaanut minutsit 20-t ataappagit, nalinginnaasumik periusaasarpoq silaannakkut kalerrisaarinerup aallartinneqartarnera, pisumi suleqatigisat oqartussallu piaarnerpaamnik iliuuseqarnissaat siunertaralugu. Ullaaq mannalu mittarfimmi AFIS operatørip, timmisartut ingerlaarnerannik alaatsinaalluni nakkutilliisup, isumannaallisaammik miitoqarnissaa pillugu kalerrisaarut aallartippaa, Malene Lynge oqarpoq.

Timmisartumi issimasut tamarmik ajunngillat, Kangerlussualiarnissaminnut takorluugaat allaanerulaarsimassagunaraluartut, motoori ataasinaaq atorlugu sillimaniarnermi minneq pilersaarut malillugu ingerlavoq. 

-Timmisartortartut ukiut tamaasa simulatorimi sungiusarnerminni motori ataasiinnaq atorlugu minnissaq sungiusartarpaat. Ullumi pisoq malittarisassat maleqqissaarlugit pivoq, timmisartortartullu pikkorissut nersualaarpakka, taamatullu Mittarfeqarfimmi upalungaarsimanissamik suliallit mittarfimmi piareersimasut, Air Greenlandimi timmisartuussinissanut pisortaq John Nielsen oqarpoq.. 

Air Greenlandip upalungaarsimanermut pilersaarutaa atulersinneqarpoq, aammalu ilaasut timmisartumilu sulisut maleruagassat malillugit isumagineqarput. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl