NÛK pikkunartumik unamminermi ajugaavoq

Ilulissat timersortarfianni pissangartorsiorneqarpoq angutini NÛK aamma Nagdlúnguak unammimmata assammik arsarluni pissartanngorniunnermi BankNordik GM-mi.
Allattoq Noah Mølgaard
apriilip 17-at 2012 21:09

NÛKp angutitai maanna inissisimallualerput assammik arsarnermi BankNordik GM-mi. Nuummiut aappaluttunik kiatillit pointinik pingaaruteqarluinnartunik marlunnik pissarsipput aaqqissuisut Nagdlúnguak Ilulissaneersoq marlunngornermi unnukkut ajugaaffigereerlugu.

Unamminerup ingerlanerani unammisut paarlakaajaallutik siuaqqasarput. NÛK iluatsitsineruvoq 25-22-mik ajugaalluni muminnermi 12-10-mik siuaqqareerlutik.

Pingasunngornermi unnukkut NÛK SAK-mut Sisimiuneersumut ajugaasinnaaguni finalemut anngunnissamut periarfissagissaartorujussuanngussaaq unamminerlu taanna KNR-TV-kkut toqqaannartumik aallakaatinneqassaaq.

Arnani GSS Nuummeersoq aamma SAK Sisimiuneersoq finalemut anngutissagatinneqarput.

Aajuku marlunngornermi angusat:

SAK - GSS angutit 16-31 (7-12)
I-69 - SAK arnat  24-32 (10-17)
K-33 - Norsaq HC angutit 30-29 (12-14)
Nagdlúnguak - GSS arnat 17-41 (8-18)
Nagdlúnguak - NÛK angutit 22-25 (10-12)

Aajuku pingasunngornermi unamminissaat
Nal. 14.00 GSS - Norsaq HC angutit
Nal. 15.45 NÛK - GSS arnat (KNR 1-mi toqqaannassaaq)
Nal. 17.30 SAK - NÛK angutit (KNR 2-mi toqqaannassaaq)
Nal. 19.15 Nagdlúnguak - SAK arnat (KNR 2-mi toqqaannassaaq)
Kl. 21.00 Nagdlúnguak - K-33 angutit