NÛK arnat futsalimi unammersuarneranni pissartanngorpoq: Tamaviaarluta piareersaratta
NÛKp ajorsartinneqanngivilluni futsalimi GM naammassivaa unammiuartakkatik siornalu pissartaasut I-69 Ilulissaneersut sapaammi finalemi 3-1-mik ajugaaffigalugit.
Iligiit taakku marluk siullermik imminnut pingasunngormat unammigamik tamarmik isertitsinatik naligiipput tassanilu NÛKp I-69 tamaviaartivissorpaa.
- Unamminerni taamatut ittuni pikkorinnerit ajugaasarput. Takusinnaavarput kikkut sungiusarluarsimanerunersut. Uagut piareersarniarnerput kipiluttunarsimavoq ikippallaat takkuttuartuummata, I-69-mi anføreri Heidi Jensen KNR-mut oqarpoq.
NÛK-mi anføreriusoq aamma isumaqarpoq GM-mut piareersarluarnertik pissarsissutigilluarlugu.
Arnat GM-mi imatut inissipput:
1. NÛK, Nuuk
2. I-69, Ilulissat
3. UB-68, Uummannaq
4. B-67, Nuuk
5. UB-83, Upernavik
6. Nagdlúnguak, Ilulissat
Ukiup iligiivi:
Kristine Inunnguaq Nielsen, Inger Thomassen, Annika Qvist Jensen, Emma Ellehauge, Victoria Black
Arsalerillaqqinnerpaaq: Laila Platou, NÛK
Akiuulluarnerpaaq: Karoline Malakiassen, UB-68
Arsallammak: Inger Thomassen, UB-83
NÛKmi tamarmik tamaviaarluarput
NÛK-mi anføreriusoq aamma isumaqarpoq GM-mut piareersarluarnertik pissarsissutigilluarlugu.
- Ole Martinsen novemberimi sungiusaasortaarivarput. Taanna piumasaqaateqarnikuuvoq taakkulu tamatta malippavut. Iligiit annertuumik ajoqusertoqarata aalaakkaasumik ingerlavugut tamaviaarlutalu piareersarluta, NÛK-mi anføreri Victoria Black KNR-mut oqarpoq.
UB-68 Uummannameersoq bronzennappoq piukkunnaateqarluartut B-67 Nuummeersoq agguaqatigiisillugu 16-nik ukioqartunik arsartoqartoq bronzennanniunnermi ajugaaffigigamikku.
UB-83 Upernavimmeersoq tallimaattut inissippoq Nagdlúnguak Ilulissaneersoq normu 5-nngorniunnermi ajugaaffigigamikku.
Unammersuarnerit sapaatip akunnera kingulleq marlunngornermiit sapaat ilanngullugu Ilulissani pipput.
