NÛK aamma I-69 puljeqatigiinngillat
![](/sites/default/files/styles/image_934x467/public/article_images/lodtraekning_0.jpg?itok=0sp663s6)
Pissartanngorniunnissap qaqugorpiaq aallartinnissaanik sooq nalornisoortoqarnersoq pillugu Nunatsinni arsaattartut kattuffiat nassuiaammat angallannerup nalorninartorsiorfiunera pisuusoq John Thorsen GBU-meersup nassuiaatigaa.
Asulu arsaalluni pissartanngorniunnissap qalliartornerani holdit ilaasinnaajunnaarlutik nalunaartorpassuusimapput.
Qeqertarsuummi tunuaniinnaq anngunniuttoqarpoq, massa nunatta sinnerani arsaattartut Nuummi pissartanngorniunnissamut ilaajumallutik nalunaaginnartariaqartarsimasut, GIF.gl nalunaarpoq.
Qeqertarsuulli tunuaneersut anngunniummata målinik isaatitsineqqusaatiinnavissimapput. Ilaatigummi siornatigut pissartaasartut I-69 Ilulissanneersut Ikerasaarsummiut arsaattartuinut Inussummut 31-0-ersuarnik isertitsillutik ajugaapput. Aamma Disko 76 Qeqertarsuarmeersut Aasiammiunut T-41-mut unammigamik 11-0-erlutik ajugaapput.
Pissartanngorniunnermilu kikkut unammissanersut GBU-p allaffiani ippassaq makitsissutigineqarpoq.
Makitsisoqarmallumi paarlakaallutik pissartaajuartartut, tassa Nûk Nuummeersoq kiisalu I-69 tamarmik immikkut puljemut inissinneqarmata qujanaannarporluunniit.
Angallannissalli nalorninartorsiorfiunerat qaangiuteriarpat sapaatip akunnerata tulliani tallimanngorpat arfininngorpalluunniit finalertoqarneranik naggaserneqarumaarnera qularutigineqassaanngitsoq GBU-miit naatsorsuutigineqarpoq.
Pulje 1-miittut ukuupput:
K-33, Qaqortoq
UB-83, Upernavik
NÛK, Nuuk
KB-84, Kangaatsiaq
Pulje 2-miittut tassaapput:
T-41, Aasiaat
I-69, Ilulissat
Disko 76, Qeqertarsuaq
B-67, Nuuk