Lemurit tamangajammik nungutitaanissaminnut aarlerinartorsiortut

Aapakaat ilaat lemurit uumasut mikisut iserujussuallit, qeqertami Madagaskarimi uumasuusut nungutitaanissaminnut aarlerinartorsiorput.

Lemurini pissuseqatigiiaani assigiinngitsuni 107-usuni taakkunannga 103-t nungutitaanissaminnut aarlerinartorsiorput. Taakkunannga 33-t ilaminnut sanilliullutik navianartorsiornerullutillu toqorarlutik nungoriaannaapput.

Nunarsuaq tamakkerlugu pinngortitaq illersorniarlugu suliniaqatigiiffiup IUCN-ip taama aarlerissaaruteqarnera, IUCN-ip nunarsuarmi tamarmi uumasut 120.000-nik sinneqartut aarlerinartorsiortutut nalunaarsuiffianni takuneqarsinnaavoq. 

Uumasuutigiumaneqaqisut

Lemurit qeqertami Madagaskarimi pissutsit assigiinngitsut pissutigalugit aarlerinartorsiorput. Qeqertami Madagaskarimi Afrikap kangianiittumi inuit piiitsuullutillu pinngortitap paarinissaanut akissaqangaanngillat.

Aamma lemurit ilarpassui unioqqutitsilluni tigusarineqarlutillu tuniniarneqartarput. Inuppaaluit lemurinik uumasuuteqarniartartut aningaasarpassuarnik akiliisarmata taakkuninnga tuniniaasartut iluanaaruteqarluarsinnaasarput.

Tamatuma saniatigut Madagaskarip orpippassuisa 40 procentii 1950-mili piiarneqalernerminniit piiarneqarsimalereerput.