Møller pitsaanerit 40-t akornanniinngilaq
Ujakkaartartup Martin Møllerip OL-imi unammiuaarnerit ulluanni kingullermi ullumi, kalaallit OL-imi angusimasaat pitsaanerpaaq angunngitsoorpaa.
Allattoq Elisa Isaksen
februaarip 23-at 2014 14:29
Martin Møller Sotjimi 50 kilometerit ujakkaareerluni normu 45-tut apuuppoq, taamalu naatsorsuutigisaraluamisut siulliit 40-t akornanniinnani.
Taamaakkaluartoq ujakkaartartoq taanna angusaminik naammagisimaarinnippoq.
- Ujakkaartartut allat ingerlaarnerat iliuuseqarfigiuminaakkami. Ujakkaartartummi nukittoorujussuit siulerigakkit, Martin Møller DR-imut oqarpoq.
Ujakkaartut siulliullutik ingerlaartorpassuit akornanniikkaluarpoq, 18 kilometerilli siulliit ingerlareerlugit taakkunannga katataalluni.
Martin Møller ajugaasunit Russinit pingasuusunit minutsinik tallimanik sekuntinillu 37-nik kingulliulluni apuuppoq.
50 kilometerinik ujakkaarnermi OL-imi aatsaat taama angusarissaarfiutigisumi Martin Møllerip angusaa pitsaasuuvoq.
- Uannut tamanna pingaaruteqarpallaanngilaq. Qanoq ujakkaarluartigininnut takussutisaaginnarpoq, matumanimi qallunaat kalaallilluunniit OL-imi angusimasaasa pitsaanerit akornanniinnissara anguniagarigakku, Martin Møller DR-imut oqarpoq.
Taamaallilluni OL-imi 50 kilometerinut ujakkaarnermi Michael Binzer suli angusarissaarnersaavoq. Taannami Nagano-mi 1998-imi OL-ertoqarnerani normu 41-tut apuukkami.
