Mærskimi sulisut inussiaatitut akissarsisarput
Australiap kippasissuani uuliamut qilleriviliami umiarsuaatileqatigiiffissuaq filippinerinik Mærsk sulisoqarpoq, taakkulu nalunaaquttap akunneranut 16 koruuni inorlugu akissarsiaqartinneqarput, sulisartut peqatigiiffiannit, Australien Workers Unionimit, pasilliut taama nipaqarpoq.
- Inussiaatitullusooq qallunaat suliffeqarfiussuannit aningaasarsiaqartinneqarput, australiamiut dollariinik pingasunik - tassa 16 koruuni inorlugu - nalunaaquttap akunneranut aningaasarsiqartinneqarlutik, sulisartut peqatigiiffianni allattaaneq, Paul Howes, oqarpoq.
- Uagut ilaasortavut Mærskimi sulisut 726.000 koruunit missaannik ukiumut aningaasarsiaqartinneqarput, Paul Howes erseqqissaavoq.
Paul Howesip oqarnera naapertorlugu, inuusuttoq McDonaldsimi sulisoq filippinerinit sulisartunit aningaasarsiaqarneruvoq, filippinerit sulisartut qilleriviliani sulilertinnatik taakkunani sulisussatut nunaminni ilinniartinneqartarput.
Suliffissarsiuusisarfinni professori, Henning Jørgensen, isumaqarpoq, filippinerimiusulli aningaasarsiakitsigaluni Australiami inuusoqarsinnaanngitsoq.
Australiap kippasissuani, uuliaqarfiullunilu gasseqarluartumi, qilleriviliami, Mærsk Discovererimi, filippinerit sulipput. Sulisartut peqatigiiffissuannit isornartorsiuisoqarmat Mærsk misissuinermik aallartitsissalluni neriorsuivoq.
A.P.Møller Mærsk akileraarutit piinnginnerini 59,6 milliardit koruuninik siorna sinneqartoorpoq. Suliffeqarfissuup ukiuni 106-ini piunerani aatsaat taama amerlatigisunik sinneqartoorpoq.
