Mærsk nutaaliortumik qillerisinnaanngornerarpoq

Uuliasioqatigiiffik Mærsk Drilling issittumi nutaaliortumik qillerisinnaanngornerarpoq.
marsip 03-at 2011 07:12

Issittumi ukioq naallugu uuliasiorsinnaalernissaq russit uuliasioqatigiiffiat Gazprom suleqatigalugu nutaaliornikkut inerisarneqarsimasoq uuliasioqatigiiffimmit atuagassiamut Ingeniørenimut oqaatigineqarpoq.

Periusissarli nutaaq sunarpiaanersoq Maersk Drillingimit oqaatigineqarusunngilaq.

- Issittumi ukioq naallugu qillerinissamut pilersaarut pillugu Maersk Gazpromilu ataatsimiissimanerat uppernarsarsinnaavarput. Maerskimi niuernikkut immikkoortortat arlallit, aamma avataaniit piginneqataasut peqatigalugit pilersaarusiaq ineriartortissimavarput, Maersk Drillingimi niuernermut pisortaq, Martin Fruergaard, atuagassiamut Ingeniørimut e-mailikkut allappoq.

Maersk Kalaallit Nunaanni uuliasiornissamut pisinnaatitaasunut ilaavoq.