Mærsk eqqunngitsunik paasissutissiisarsimavoq
Maangaannartitsinerup annertussusaa pillugu kisitsisit eqqunngitsut pisortanut ukiuni arlalinni tunniunneqartarsimapput. Paasissutissat nutaat atiminik isertuusserusuttumit Miljøstyrelsimut tunniunneqartut tamanna ersersippaat.
Ukiuni kingullerni marlunni uuliamik maangaannartitsineq pisortanut nalunaarutigineqartunit annertunerusimavoq. Mærskimit paasissutissat naapertorlugit uulia 2009-mi maangaannartinneqartoq 184 tonsiusimavoq. Kisianni kisitsisit suliffeqarfiup nammineq pigisai naapertorlugit uulia maangaannartinneqartoq 72 procentimik annertunerusimavoq, tassa 317 tonsiusimalluni, aviisi Politken taama allaaserisaqarpoq.
2008-mi aamma eqqunngitsumik paasissutissiisoqarsimavoq. Taamatut eqqunngitsumik paasissutissiineq Miljøstyrelsemit sakkortuumik assuarineqartoq, aviisimi allaaserineqarpoq.
Mærsk Olie og Gas aatsaat tusagassiorfinnit sammineqalinngilaq. Imaani uuliamik mingutsitsisoqarneranik alapernaarsuisartunik aallartoqaleraangat, uuliasioqatigiiffik Mærsk imaani uuliasiorfimminnut nalunaartarsimasoq qanikkuttut aamma paasineqarpoq.
Mærsk Olie og Gas nunatta sineriaani uuliasortussatut akuerisaaqqammerpoq. Aamma nunatta avataani ukiut tallimat missaat qaangiuppata misiliillutik qillerilersinnaanissartik naatsorsuutigaat.
