Mælkebøttenip meerartaasa misissuiffigilernerat qujaruppaa
Suna pissutigalugu meeqqat inuttut ajornartorsiuteqaraluarlutik pissusitoqqaminnik allanngortitsisarnersut ilisimatusarnikkut akissutissarsiniarneqarnera, Maliina Abelsenip taamaalilluni taperserpaa, ajornartorsiutit aaqqiiviginiarneqartussat suunersut ilisimasaqarfigineqarnerulernissaat neriuutigalugu.
Ilaqutariit iluanni imigassartortarnerit nakuuserniartarnerillu pissutaallutik Kalaallit Nunaanni meeqqat amerlasuut ajornartorsiuteqartut isumasioqatigiinnerpassuarni nalunaarusiornikkullu saqqummiunneqartareerpoq, maannangaarlu iliuuseqartoqartariaqartoq, Isumaginninnermut naalakkersuisoq Maliina Abelsen oqarpoq:
- Iliuuseqartoqartariaqarpoq. Meeqqat Nunatsinniittut qanoq atugaqarnersut misissorneqartareerpoq, ukiulli pingasut, tallimat qulingilualluunniit qaangiuppata meeqqat taakku sumiissanersut aatsaat apeqqutigineqartalerpoq, Maliina Abelsen oqarpoq.
Meeqqat 60-it ilisimatuunit ukiuni qulingiluani malittarineqassapput. Meeqqat inuunermikkut eqqarsartaatsimikkullu atugaat sullissiveqarfimmi najugaqarneranni kiisalu nuunnerminniit ukiut arfineq-marluk qaangiunneranni malittarineqassapput, taamatullu misissuisarneq Nunatsinni amigaataammat, Maliina Abelsenip pilersaarutit tapersersorpai.
- Taamatut misissuiniartoqarnera "Mælkebøtten"-ip siuttuuffiginiarmagit nuannaarutigaara, tamakkuninnganummi tunngasunut ilisimasakippallaarpugut, taamaammallu aningaasartuuteqangaatsiartarluta, Maliina Abelsen oqarpoq.
Taanna aamma oqarpoq misissuinerit inerneri isumaginninnermik sulialinnit atorneqarsinnaalluarumaartut.
Inooqatigiinnut tunngasunut Danmarkimi Ilisimatusarfik kiisalu Nuummi meeqqat inuusuttullu ornittagaat "Mælkebøtten" misissuisitsisuupput, Isumaginninnermullu Naalakkersuisoqarfimmit 50.000-it koruuninik aningaasaliisoqarluni.
