Mælkebøttenip ingerlalluarnera nuannaarutigineqarpoq nikallungassutigineqarlunilu

Mælkebøttimut tunissutigineqarsimasut nerriveeqqamut ilineqarsimapput ballonngillu pullanneqarsimallutik. Tassami meeqqat inuusuttullu ornittagaat ukiut qulit qaangiummata ammarneqarpoq.

Ukiunilu ingerlareersuni pisoqarsimaqaaq.

- Angusaqaqaagut, Mælkebøttenimi ulluinnarni ingerlatsisoq, Naja Sarkov Petersen oqarpoq.

Mælkebøtten Sulisitsisut Peqatigiiffiannit isumassarsiarineqarpoq, inuusuttut amerlanerit sulisalernissaat siunertaalluni.

- Meeqqanut iluaqutaasinnaasumik taamani pilersitsiniarsarivugut. Suliffitsinni sulisussanik amerlanernik pissarsinissarput siunertaalluni, Mælkebøttecenterip siulersuisuini siulittaasoq, Henrik Sørensen oqarpoq.

Ornittarfik ammaqqaarmat sisamanik sulisoqarpoq, sapaatit akunneranut ulluni sisamani ammasarluni, arfininngornermi sapaammilu taamaallaat unnuaq ilanngullugu ammasarluni.- Taava meeqqat taakkua inissinneqarnikut immaqa angerlarnissaminnut suli piareersimanngikkaluarlutik angerlaqqittarsimassapput. Taanna pinaveersaartinniarlugu, meerarlu qitiutillugu sulisussaagatta, maani utaqqiisaagallartumik inissinneqartalerput, sapaatillu akunnera tamaat ammasalerluni, Naja Sarkov Petersen oqarpoq.

Mælkebøttecenteri ukiut qulit ingerlaneranni alliartuinnarpoq. Immikkoortortaqarfiit marluk allat ammarneqarput, sulisullu sisamaniit 32-nut amerlipput.

Mælkebøttecenterili taama alliartortiginissaa pilersaarutaasimanngilaq, pisunilli assigiinngitsunik pissuteqarluni. Taamalu ukiut qulit ingerlaneranni alliartorsimatiginera, siulersuisuni siulilittaasup tupigaa.

- Taama ineriartornissaa takorluunngikkaluarpara. Piffissalli ingerlanerani suliassat amerliartorput, aningaasaliisullu aamma amerliartorlutik, Henrik Sørensen oqarpoq.

Kisianni Mælkebøttecenterip alliartornera meeqqat inuusuttullu inuuniarnikkut ajornartorsiutaannik aallaaveqarmat, siulittaasoq nuannaavissinnaanngilaq.

- Tamanna pisariaqarsimammat nikallungassutigilaarpara. Tassami meeqqanik atugarliortoqannginnissaa pitsaanerujussuussagaluarpoq, Mælkebøttecenterip siulersuisuini siulittaasoq, Henrik Sørensen oqarpoq.