Mælkebøtten tapiiffigaa ingerlatseqataanianngilarli

novembarip 24-at 2004 12:27

Nuup Kommuneata, meeqqanut inuusuttuaqqanullu ornittagassatut pilersaarutigineqartumut, Mælkebøtte-mut ukiuni pingasuni, ukiumut 1 milliuuninik tapiissuteqarnialerpoq, borgmester Agnethe Davidsen ima tunngavilersuivoq:

- Ingerlatsiniartut namminersortuunerat aallaavigalugu, ukiuni pingasuni ingerlatsinermut atugassaannik milliuuninik tunissallugit aalajangerpugut. Taamaalilluta aamma qulakkeerniarparput, namminneq pigisutut ingerlanneqassasoq.

Aningaasat amerlanerusut atorneqassappata, soorunami namminneq ingerlatsiniat nammineerlutik ujarleqqittariaqassapput.

Agnethe Davidsen aamma oqarpoq, aningaasaliinerminnut atatillugu, aallarnisaasut ukiut marluk qaangiuppata nalunaarusiussasut kommunalbestyrelsip piumasaqaatigigaa.

Ornittagassamik pilersaaruteqartut ingerlatsinermut aningaasartuutit 3,9 million koruuninik amerlassusillit kommunimut qinnuteqaatigisimagaluarpaat. Kommunip ukiumut million koruuninik, ukiuni pingasuni aningaasaliinera Mælkebøttemik pilersitsiniani ataqatigiissaarisup Kirsten Ørgaardip nuannaarutigaa.

- Ingerlatsinermut aningaasartuutissat tamaasa pissarsiarinngikkaluarlugit, taamaattoq ingerlaqqinnissatsinnut tunngavissarissaarnerulerpugut, neriulluarlutalu aningaasaateqarfinnut qinnuteqaqattaarnerput ingerlaannassaaq, Kirsten Ørgaard oqarpoq.

Mælkebøttemut aamma aningaasaleqataapput, Red Barni, Sulisitsisut Peqatigiiffiat, Nuummi hoteliutilik Svend Junge kiisalu kunngissakkut.