Målikannersuaq eqqarsalersitsivoq
Arsaattuni 35-0-mik 14-0-millu ajugaasoqarnera GMip naggataarneqarnerani takussaasussaanngikkaluarpoq. Taamaakkaluartoq tassa arnat arsaallutik Nuummi pissartanngorniunneranni taama pisoqarpoq. Arsaattaartut kattuffiata maanna isumaliutigilerpaa aappaagu pissartanngorniunnissanut allannguinissaq.
Arsaattut nuannaarlutillu ugguarrapput isiginnaartullu ileqimisaartorput akuerisinnaanagu GMip naggataarneqarnerani taama pisoqarmat. Isiginnaartuinnaanngillalli taama nikingasoqarnerujussuanik isornartoqartitsisut.
- Tamanna tullianik GBU-mi siulersuisut ataatsimiilerutta oqaluuserisassanngortinniarpara, Oluf Olrik GBUp unammersuarnermut ataatsimiititaliaani siulittaasoq KNR-mut taama oqarpoq.
Taanna suli tigussaasumik siunnersuusiunngikkaluarpoq GMip naggataarneqarnera qanoq iliorluni pitsaanerusunngortinneqarsinnaanersoq. Ilanngulluguli eqqaavaa GM-ip naggataarneqarnissaata qanilliartornerani peqataasinnaajunnaartorpassuaqarnera. Tamannarpiaq pissutigalugu Qeqertarsuup tunuani taamaallaat anngunniuttoqarsimavoq klubbit allat nalunaarneq taamaallaat atorlugu GMip naggataarneqarnissaanut peqataasussanngortinneqartut.
Arnat pissartanngorniunnerisa naggataarneqarnerani pilersaarutit malillugit iligiit arfineq pingasut peqataasussaasimagaluarput. Kisiannili UB-83 Upernavimmiik peqataasinnaajummaat allamik taartissarsineqanngilaq.
- Siorna arnat pissartanngorniuttussanngormata aamma peqataasinnaajunnaartoqarpoq taamanilu iligiit peqataasussat arfiniliinnanngortippagut aammalu Nuummi nalaanneqartutut naligiinnginnerujussuaqanngilaq, Oluf Olrik oqarpoq.
- Taamaattumik isumaliutigisariaqassavarput aappaagu pissartanngorniunnerit naggataarneqarneranni iligiit arfiniliinnanngortinneqarnissaat, Oluf Olrik oqarpoq.
Taanna aamma isumaqarpoq klubbit ajorsarujussuartut eqqarsalersinneqarsimassasut.
- Taakkumi takusinnaalersimassavaat pikkorinnerit anguniarunikkit qanoq sungiusarnerusariaqartiginerlutik, Oluf Olrik oqarpoq.
Suli aalajangerneqanngilaq qaqugu GBUp siulersuisuisa ukiormanna pissartanngorniunnerit nalilersussaneraat.
Arnat semifinalerneranni KNR radio toqqaannartumik aallakaatitsissaaq aqagu nalunaaqutaq 13.00-miit aamma nalunaaqutaq 15.00-miit.
